काठमाडौं । पछिल्लो एक सातायता सुनको भाउ ओरालो लागेको छ । नेपाल सुनचाँदी व्यवसायी महासंघका अनुसार गत मंगलवारयता सुनको भाउ ओरालो लागेको हो । उक्त दिन तोलामा २०० रुपैयाँ घटेर १ लाख ३ हजार पुगेको सुनको भाउ आज (सोमवार) १ लाख १ हजार ८०० रुपैयाँ तोकिएको छ । अर्थात् मंगलवारयता सुनको भाउ तोलामा १४ सय रुपैयाँ घटिसकेको छ ।
आज भने सुनको भाउ तोलामा २०० रुपैयाँ घटेको छ । गत आइतवार सुन प्रतितोला १ लाख २ हजार रुपैयाँमा कारोबार भएको थियो ।
त्यसैगरी आज चाँदीको मूल्य पनि घटेको छ । महासंघका अनुसार आज चाँदी तोलाको ५ रुपैयाँले घटेर १ हजार २५५ रूपैयाँ कायम भएको छ । अघिल्लो दिन चाँदी प्रतितोला १ हजार २६० रुपैयाँमा कारोबार भएको थियो ।
अन्तरराष्ट्रिय बजारमा भने आज सुनको मूल्य घट्दो क्रममा छ । आज (नेपाली समय अनुसार बिहान १२:१० बजे) न्यूयोर्क मर्कन्टाइल एक्सचेञ्जको कोमेक्स डिभिजनमा स्पट गोल्डको मूल्य प्रतिऔंस १ हजार ८०९ दशमलव ७९ डलर पुगेको छ । अघिल्लो कारोबार दिन (शुक्रवार) स्पट गोल्डको मूल्य प्रतिऔंस १ हजार ८११ दशमलव १० डलरमा बन्द भएको थियो ।
त्यसैगरी आज डलरको मूल्य स्थिर छ । आज १ अमेरिकी डलरको विक्री दर १३२ रुपैयाँ ७१ पैसा कायम भएको छ । अघिल्लो दिन पनि १ अमेरिकी डलरको विक्री दर १३२ रुपैयाँ ७१ पैसा थियो ।
