काठमाडौं । कोभिड–१९ को नयाँ भेरियन्ट ओमिक्रोनको संक्रमण तीव्ररूपमा बढ्दै गएपछि विशेष अदालत, उच्च अदालत पाटन, जिल्ला अदालत काठमाडौंले अत्यावश्यक सेवा मात्र सञ्चालन गर्ने भएका छन् । विशेष अदातलका सूचना अधिकारी नारदप्रसाद भट्टराईले बुधवार जारी गरेको सूचनामा थुनुवा भएका मुद्दाको भर्चुअल माध्यमबाट सुनुवाइ गर्ने, आरोपपत्र, अभियोगपत्र दर्ता गर्ने, भर्चुअल माध्यमबाट अभियुक्तको थुनछेक र म्याद थप गर्ने उल्लेख छ ।
त्यस्तै, उच्च अदालत पाटनले पनि आफ्ना सेवा कटौती गरेको छ । उक्त अदालतका रजिस्ट्रार ठगिन्द्र कट्टेलले जारी गरेको विज्ञप्तिमा बन्दीप्रत्यक्षीकरणको निवेदनमा नियमति रूपमा सुनुवाइ गर्ने, मुद्दा फिर्ता, तामेली एवं मिलापत्रसम्बन्धी कामकारबाही अघि बढाउने उल्लेख छ । यस्तै, जिल्ला अदालत काठमाडौंले पनि अत्यावश्यक मुद्दामा मात्र सुनुवाइ गर्ने भएको छ ।
सर्वोच्च अदालतको मंगलवार बसेको पूर्ण बैठक (फुलकोर्ट)ले पनि अति जरुरी प्रकृतिका मुद्दा मात्र बुधवारदेखि लागू हुनेगरी सुनुवाइ गर्ने निर्णय गरेको थियो । सर्वोच्च अदालतका प्रवक्ता बाबुराम दाहालका अनुसार सर्वोच्च अदालतमा एक न्यायाधीशसहित ३४ जना र देशभर न्यायाधीश र कर्मचारी गरी १२५ भन्दा बढीलाई कोरोना संक्रमण भएको छ । रासस
