पुस १५, काठमाडौं । नेपाल स्टक एक्सचेञ्ज (नेप्से) ले बिहीवार पाँच ओटा कम्पनीको बोनस शेयरको मूल्य समायोजन गरेको छ । नेप्सेले चिलिमे हाइड्रोपावर कम्पनी लिमिटेड, इन्फिनिटी वित्तीय संस्था, मन्जुश्री फाइनान्स, एनआरएन इन्फ्रास्टक्चर एण्ड डेभलपमेण्ट र समिट लघुवित्त वित्तीय संस्थाको मूल्य समायोजन गरेको हो ।
यी ५ आटै कम्पनीले लाभांश तथा साधारण सभा प्रयोजनार्थ बिहीवार बुकक्लोज गरेसँगै नेप्सेले शेयरमूल्य समायोजन गरेको हो ।
नेप्सेले चिलिमे हाइड्रोपावरको ७ दशमलव ५० प्रतिशत बोनस शेयरको समायोजनपछि शेयरमूल्य रू. ४६७ दशमलव ८१ तोकेको छ । कम्पनीको अघिल्लो कारोबारको दिन अर्थात् बुधवार कायम अन्तिम शेयरमूल्य रू. ५०२ दशमलव ९० को आधारमा शेयरमूल्य समायोजन भएको हो ।
चिलिमे जलविद्युतले गत आर्थिक वर्षको मुनाफाबाट हाल कायम चुक्ता पूँजीको ७ दशमलव ५ प्रतिशत बोनस शेयर र सोको कर प्रयोजनको लागि सहित ७ दशमलव ५ प्रतिशत नगद लाभांश गरी कुल १५ प्रतिशत लाभांश वितरण गर्ने घोषणा गरेको छ। उक्त लाभांश प्रस्ताव पारित गर्न कम्पनीले पुस २३ गते २५ औं वार्षिक साधारण सभा बोलाएको छ ।
त्यस्तै, नेप्सेले इन्फिनिटी लघुवित्त वित्तीय संस्थाको २७ दशमलव ७० प्रतिशत बोनस शेयरको समायोजनपश्चात मूल्य रू. १ हजार ३०७ दशमलव ७५ तोकेको छ ।
नेप्सेले अघिल्लो कारोबार दिनको अन्तिम मूल्यका आधारमा समायोजन गरेको हो । बुधवार कम्पनीको शेयर प्रतिकित्ता रू. १ हजार ६७० मा अन्तिम कारोबार भएको थियो ।
इन्फिनिटी लघुवित्तले हाल कायम चुक्ता पूँजीको २७ दशमलव ७० प्रतिशत बोनस शेयर र कर प्रयोजनका लागि १ दशमलव ४६ प्रतिशत नगद लाभांश वितरण गर्ने घोषणा गरेको छ ।
सो लाभांश पारित गर्न कम्पनीले पुस २७ गते होटल द नारायणी, गैंडाकोट, नवलपरासीमा पाँचौं वार्षिक साधारण सभा बेलाएको छ । सभा बिहान १० बजे शुरु हुने कम्पनीले जानकारी दिएको छ ।
त्यसैगरी, नेप्सेले मन्जुश्री फाइनान्सको ४० प्रतिशत बोनस शेयरको समायोजनपछि शेयरमूल्य रू. ६७० दशमलव ७१ तोकेको छ । कम्पनीको अघिल्लो कारोबारको दिन अर्थात् बुधवार कायम अन्तिम शेयरमूल्य रू. ९३९ को आधारमा शेयरमूल्य समायोजन भएको हो ।
मञ्जुश्री फाइनान्सले ४० प्रतिशत बोनस शेयर र ६ प्रतिशत नगद लाभांश (करसहित) वितरण गर्ने घोषणा गरेको छ । सोही लाभांश प्रस्ताव पारित गर्न कम्पनीले आफ्नै कार्यालय, नयाँ बानेश्वरमा पुस २९ गते १४औं वार्षिक साधारण सभा बोलाएको छ । सो सभा बिहान ११ बजे शुरु हुनेछ ।
नेप्सेले एनआरएन इन्फ्रास्टक्चरको ५ प्रतिशत बोनस शेयरको समायोजनपछि शेयरमूल्य रू. ५११ दशमलव ४३ तोकेको छ । कम्पनीको अघिल्लो कारोबारको दिन अर्थात् बुधवार कायम अन्तिम शेयरमूल्य रू. ५३७ को आधारमा शेयरमूल्य समायोजन भएको हो ।
एनआरएन इन्फ्रास्टक्चर एण्ड डेभलपमेन्ट कम्पनीले लाभांश पारित गर्न पुस २९ गते बिहान ११ बजे आम्रपाली ब्यांक्वेट, काठमाडौंमा नवौं वार्षिक साधारण सभा बोलाएको छ । सभाले गत आर्थिक वर्षको मुनाफाबाट प्रस्तावित ५ प्रतिशत बोनस शेयर र कर प्रयोजनको लागि शून्य दशमलव २६ प्रतिशत नगद लाभांश पारित गर्नेछ ।
त्यस्तै, नेप्सेले समीट लघुवित्त वित्तीय संस्थाको २५ दशमलव २८ प्रतिशत बोनस शेयरको समायोजनपश्चात मूल्य रू. १ हजार १६५ दशमलव ३४ तोकेको छ ।
नेप्सेले अघिल्लो कारोबार दिनको अन्तिम मूल्यका आधारमा समायोजन गरेको हो । बुधवार कम्पनीको शेयर प्रतिकित्ता रू. १ हजार ४६० मा अन्तिम कारोबार भएको थियो ।
समीट लघुवित्तले गत आर्थिक वर्षको मुनाफाबाट शेयरधनीहरुलाई वितरण गर्ने घोषणा गरेको लाभांश र एफपीओ निष्कासन गर्ने प्रस्ताव पारित गर्न पुस २४ गते, आँबुखैरेनी रेष्टुराँ एण्ड पार्टी प्यालेस, आँबुखैरेनी, तनहुँमा १३औं वार्षिक साधारण सभा बोलाएको छ । उक्त सभा बिहान १० बजे शुरु हुने बताइएको छ।
सभाले हाल कायम चुक्ता पूँजीको २५ दशमलव २८ प्रतिशत बोनस शेयर वितरण गर्ने, सजिलो लघुवित्त र समीट लघुवित्त एक आपसमा मर्जर र बोनस शेयर जारी गरेपश्चात संस्थापक र सर्वसाधारण शेयर पूँजीको अनुपातमा मिलान गर्दा नपुग भएको सर्वसाधारण तर्फको ७ लाख ५१ हजार ७१२ कित्ता साधारण शेयर प्रिमियममा एफपीओ जारी गर्ने, सो सम्बन्धी सम्पूर्ण कार्य गर्न सञ्चालक समितिलाई अख्तियारी दिने, अन्य लघुवित्त वित्तीय संस्थासँँग मर्जर तथा एक्विजिशन गर्न सञ्चालक समितिलाई अख्तियारी दिने लगायतका प्रस्तावहरु समेत पारित गर्नेछ ।
