.jpg)
चैत ८, काठमाडौं । ग्रीन भेन्चर्स लिमिटेडले चैत ८ गते मंगलवादेखि सर्वसाधारणमा आईपीओ निस्कासन गरेको छ । कम्पनीले प्रति शेयर १०० रुपैयाँ अंकित दरको ३१ लाख २५ हजार कित्ता आईपीओ सर्वसाधारणमा वितरण गर्न लागेको हो ।
सर्वसाधारणका लागि छुट्याएको कुल कित्ता शेयरमध्ये ३ प्रतिशत अर्थात् ९३ हजार ७५० कित्ता शेयर कर्मचारीहरुका लागि र ५ प्रतिशत अर्थात् १ लाख ५६ हजार २५० कित्ता शेयर सामूहिक लगानी कोषको लागि सुरक्षित गरीएको छ । यी बाहेक बाँकी २८ लाख ७५ हजार कित्ता शेयर भने सार्वजनिक निष्कासनमा आएको हो ।
यो आईपीओ खरीदका लागि छिटोमा चैत ११ गतेसम्म आवेदन दिन सकिने व्यवस्था छ । छिटो अवधिभित्र माग बमोजिम आवेदन नपरेमा भने ढिलोमा चैत २२ गतेसम्म आईपीओ विक्रीको मिति कम्पनीले तय गरेको छ । तर यस अघिको आईपीओमा परेको आवेदनको प्रवृत्ति हेर्दा छिटोमा चैत ११ गतेभित्र मात्र यो आईपीओ विक्रीमा रहने सम्भावना छ ।
यो आईपीओ खरीदका लागि न्यूनतम १० कित्तादेखि अधिकतम ५० हजार कित्तासम्म आवेदन दिन सकिने व्यवस्था छ । विक्री प्रबन्धकमा लक्ष्मी क्यापिटल मार्केट लिमिटेड रहेको छ । विक्री प्रबन्धकसँगै सम्पूर्ण आस्बा सेवमा सहभागी बैंक तथा वित्तीय संस्था र तीनका शाखा कार्यालयहरुबाट आवेदन दिन सकिने व्यवस्था छ ।
यो आईपीओलाई केयर रेटिङ्ग नेपालले समयमै वित्तीय दायित्व पुरा गर्ने सम्बन्धमा मध्यम रुपमा सुरक्षित रहेको संकेत गर्ने केयर एनपी डबल बी इस्यूर रेटिङ्ग प्रदान गरेको छ ।
यस अघि कम्पनीले आयोजना प्रभावित स्थानियमा ३१ लाख २५ हजार कित्ता शेयर फागुन २ गतेदेखि १० गतेसम्म विक्री खुला गरी फागुन २९ गते बाँडफाँट गरिसकेको छ । आईपीओमार्फत जुट्ने पूँजी कम्पनीले बैंक तथा वित्तीय संस्थाको ऋण तिर्न उपयोग गर्ने बताएको छ ।
कम्पनीको परिचय :
यो कम्पनी विक्रम सम्बत् २०६१ साल मंसिर २२ गते कम्पनी रजिष्ट्रारको कार्यालयमा प्राइभेट लिमिटेड कम्पनीको रूपमा दर्ता भएको हो । यस कम्पनीमा आयोजना प्रभावित क्षेत्रका बासिन्दा तथा सर्वसाधारणहरूको जनसहभागिता विस्तार गर्ने हेतुले २०७५ फागुन १३ गतेदेखि कम्पनी ऐन, २०६३ बमोजिम पब्लिक लिमिटेड कम्पनीमा परिणत भइ कारोबार सञ्चालन गरिरहेको छ ।
कम्पनीले ओखलढुंगा जिल्लाको लिखु–४ जलविद्युत आयोजनाबाट ५२ दशमलव ४ मेगावाट जलविद्युत उत्पादन गर्ने उद्देश्यअनुरूप जलविद्युत् आयोजनाको निर्माण, उत्पादन तथा सञ्चालन गर्न विद्युत उत्पादनको अनुमति पाएको हो ।
कम्पनीले निर्माण गरेको लिखु–४ जलविद्युत आयोजनाबाट उत्पादन गरिएको विद्युत् एकमुष्ठ नेपाल विद्युत् प्राधिकरणले खरीद गर्न मञ्जुर गरी कम्पनी र प्राधिकरणबीच २०७३ असार २९ गते विद्युत् खरीद विक्री सम्झौतासमेत सम्पन्न भएको थियो ।
अहिले यो आयोजनाले विद्युत् प्राधिकरणसँग भएको सहमतिअनुसार व्यापारिक उत्पादन शूरू हुने मिति देखिनै विद्युत् उत्पादन गरी विद्युुत् विक्री गरिरहेको छ । लिखु–४ जलविद्युत आयोजनाको कुल अनुमानित लागत १२ अर्ब ८ करोड रुपैयाँ रहेको छ । उक्त आयोजनाको ओसत प्रति मेगावाट लागत २३ करोड रुपैयाँ अनुमान गरिएको छ ।
कम्पनीको पूँजीको अवस्था :
यस कम्पनीको अधिकृत पूँजी ५ अर्ब छ । जारी पूँजी भने ३ अर्ब १२ करोड ५० लाख रुपैयाँ छ । तत्काल चुक्तापूँजी २ अर्ब ५० करोड कम्पनीका संस्थापक शेयरधनीहरूबाट र ३१ करोड २५ लाख रुपैयाँ स्थानीयबाट पनि चुक्ता भइसकेको छ ।
त्यस्तै बाँकी ३१ करोड २५ लाख रुपैयाँको आईपीओ निष्कासनपछि कम्पनीको चुक्तापूँजी ३ अर्ब १२ करोड ५० लाख पुग्नेछ । आईपीओपश्चात् कम्पनीमा संस्थापक शेयरधनीको ८० प्रतिशत, स्थानीय सर्वसाधारणको १० प्रतिशत र सामूहिक लगानी कोष, कर्मचारीसहित सर्वसाधारण शेयरधनीको हिस्सा १० प्रतिशत कायम हुनेछ ।
कम्पनीको सञ्चालक समिति :
कम्पनीको नियमावलीमा ७ जना सदस्य सञ्चालक समितिमा रहने व्यवस्था छ । जसमध्ये संस्थापक समूहबाट मनोनित वा निर्वाचित सञ्चालक ५ जना हुने छन् भने सर्वसाधारण शेयरधनीमध्येबाट १ जना निर्वाचित हुने छन् ।
त्यस्तै स्वतन्त्र सञ्चालकमा १ जना छनोट हुने व्यवस्था छ । हाल कम्पनी सञ्चालक समितिको अध्यक्षमा सुभाष चन्द्र संघई रहेका छन् । त्यस्तै संचालकमा विरेन्द्र कुमार संघई, गोविन्द लाल संघई, त्रिलोक चन्द अग्रवाल र अनुज अग्रवाल रहेका छन् ।
कम्पनीको वित्तीय अवस्था :
आर्थिक वर्ष २०७७/७८ पुससम्मको अपरिष्कृत वित्तीय विवरण अनुसार कम्पनीको प्रतिशेयर आम्दानी २ रुपैयाँ शुन्य १ पैसा छ । उक्त विवरणअनुसार प्रति शेयर नेट्वर्थ ९३ रुपैयाँ ८७ पैसा छ । सो अवधिमा कम्पनीको सञ्चित नाफा ५ करोड २ लाख रुपैयाँ छ ।
कम्पनीको प्रक्षेपित तथ्यांकअनुसार आर्थिक वर्ष २०८०/८१ सम्म प्रति शेयर आम्दानी १० रुपैयाँ २७ पैसा हुने छ भने प्रति शेयर नेट्वर्थ १२१ रुपैयाँ ६३ पैसा हुनेछ । यो अवधिसम्ममा सञ्चित नाफा ३२ करोड ९ लाख ६० हजार रुपैयाँ पुग्ने प्रक्षेपण गरिएको छ ।
यस कम्पनीले ओखलढुङ्गा जिल्लामा ५२ दशमलव ४ मेगावाट क्षमताको लिखु–४ जलविद्युत आयोजना निर्माण सम्पन्न गरिसकेको छ । कम्पनीको वास्तविक प्रतिशेयर नेटवर्थ आर्थिक वर्ष ०७७/७८ सम्म रू. ९१ दशमलव ८६ रहेको छ ।
गत आर्थिक वर्षको अन्त्यसम्म कम्पनी रू. ९७ लाख ९९ हजार सञ्चित नोक्सानीमा रहेको छ । चालू आर्थिक वर्षको पुस मसान्तसम्मको अपस्किृत वित्तीय विवरण अनुसार भने कम्पनीको सञ्चित नाफा रू. ५ करोड २ लाखभन्दा बढी छ ।
पहिलो शेयर कारोबारका लागि कति पाउला मूल्यरेञ्ज?
कम्पनीले सर्वसाधारणमा आईपीओ बाँडफाँट पश्चात कायम भएको पूँजी बराबरको शेयर धितोपत्र दोस्रो बजारमा सूचीकृत गराउँनेछ । कम्पनीको स्थानीयको शेयर बाँडफाँट भएको मितिले तीन वर्षमसम्म विक्री हुने छैन बाँकी शेयर सूचीकृत भएको दोस्रो दिनदेखि कारोबारयोग्य हुनेछ ।
नेपाल स्टक एक्सचेञ्ज (नेप्से) ले कम्पनीको पहिलो कारोबारका लागि वास्तविक प्रतिशेयर नेटवर्थदेखि त्यसको तीन गुणासम्मको मूल्यरेञ्ज तोक्ने व्यवस्था छ । कम्पनीको वास्तविक प्रतिशेयर नेटवर्थ आर्थिक वर्ष ०७७/७८ सम्म रू. ९१ दशमलव ८६ रहेको छ । यस आधारमा नेप्सेले कम्पनीको पहिलो शेयर कारोबारका लागि प्रतिकित्ता रू. ९१ दशमलव ८६ देखि अधिकतम रू. २७५ दशमलव ९८ सम्मको मूल्यरेञ्ज पाउनेछ ।
