काठमाडौँ महानगरपालिकाले अब सीमा पर्खाल नियमित गर्ने तथा अनधिकृत सीमा पर्खाल हटाउने अभियान सुरु गर्ने भएको छ। यस बारे काठमाडौँ महानगरपालिकाले ३५ दिने सार्वजनिक सूचना समेत जारी गरेको छ ।काठमाडौँ महानगरपालिका क्षेत्रभित्र प्रचलित भवन निर्माण सम्बन्धी मापदण्ड (भवन भन्नाले कम्पाउन्ड वाल समेतलाई जनाउने कानूनी व्यवस्था छ) ले तोके बमोजिम जुनसुकै प्रकृतिका घर जग्गा घेर्न निर्माण गरिने सीमा पर्खाल (कम्पाउन्ड वाल) को नक्सा पेस गरी प्रचलित कानून बमोजिम नक्सा पास भएपछि सो नक्सा बमोजिम मात्र सीमा पर्खाल निर्माण गर्नुपर्नेमा कतिपय पर्खालहरू नक्सा पास बिना तथा मापदण्ड विपरीत निर्माण भएको देखिएकोले सूचना प्रकाशित गरिएको महानगरले जनाएको छ । सूचना प्रकाशित भएको मितिले ३५ दिनभित्र भवन निर्माण सम्बन्धी प्रचलित मापदण्ड अनुकुल भएका तर नक्सा पास नगरी निर्माण गरिएका सीमा पर्खालको नियमित गर्ने प्रयोजनार्थ नक्सा पेस गर्न तथा ३५ दिनभित्र प्रचलित भवन निर्माण मापदण्ड विपरीत बनाइएका सीमा पर्खाल हटाउन महानगरले आग्रह गरेको छ । ३५ दिनको समयभित्र नियमित हुने प्रकृतिका सीमा पर्खालको हकमा नक्सा पेस नगरेमा र मापदण्ड विपरीतका सीमा पर्खाल नहटाइएमा महानगर कार्यालयबाट टोली खटी आई त्यस्ता सीमा पर्खाल हटाइने महानगरले जनाएको छ । महानगर कार्यालयबाट टोली खटी आई त्यस्ता सीमा पर्खाल हटाउँदा लागेको खर्च समेत सरकारी बाँकी सरह सम्बन्धित घर जग्गा धनीबाटै असुल उपर गरिने महानगरले प्रष्ट पारेको छ।
