बागलुङ । राष्ट्रिय गौरवको आयोजनाको रूपमा रहेको मध्यपहाडी (पुष्पलाल) लोकमार्गअन्तर्गत बागलुङ बजारको उपल्लाचौरदेखि घोडाँबाधेसम्मको सडक दुई खण्डमा विभाजन कालोपत्र शुरू गरिएको छ । ठेक्का सम्झौता गरिएको ६ वर्षपछि बागलुङ बजार खण्ड र बिहुँ खण्डमा एकसाथ कालोपत्र शुरू गरिएको हो ।
मध्यपहाडी लोकमार्ग आयोजना कार्यालयको अन्तिम चेतावनीपछि ठेकेदारले सडक कालोपत्र थालेको छ । अहिले उक्त खण्डमा २०० भन्दा बढी श्रमिक तथा साना–ठूला ५० भन्दा बढी उपकरण परिचालन गरेर कालोपत्रको काम शुरू गरिएको हो ।
अहिले भइरहेको काम हेर्दा लोकमार्ग स्तरोन्नति छिट्टै सम्पन्न हुने आशा स्थानीयवासीको छ । २६ वर्षदेखि सडकको धूलो खाँदै आएका स्थानीयवासी सडक कालोपत्र हुन थालेपछि उत्साहित भएको बागलुङ नगरपालिका–४ हाडेपाखाका देवी शर्माले बताइन् ।
अहिले जिल्ला सदरमुकामबाट अछेतेतर्फ कालोपत्रका लागि उपल्लाचौरबाट काम शुरू गरिएको र उपल्लो खण्डको राइटेपोखरीदेखि सापकोटा चोक हुँदै अमर मावि घुम्टीसम्म कालोपत्र भइरहेको स्थानीयवासी दिवस कँडेलले बताए । लोकमार्गको बिहुँ र बागलुङ बजार खण्डमा एकैपटक कालोपत्र गर्न निरन्तरको पहल र समन्वयका कारण सहज भएको हो । चैत मसान्तसम्ममा करीब १० मिलोमिटर सडक कालोपत्र गर्नेगरी ठेकेदार काममा खटिएको लोकमार्ग आयोजना प्रमुख नारायणदत्त भण्डारीले जानकारी दिए ।
‘उपल्लाचौर र बिहुँबाट कालोपत्र थालिएको छ भने अछेते र तल्लो बिहुनमा पूर्वाधार निर्माणलाई तीव्रता दिइएको छ,’ उनले भने, ‘ठूलो चुनौतीका साथ ढिलै भए पनि सडक कालोपत्र थालिएको छ, अहिले उपल्लाचौरको न्यू ओएसिस स्कुलदेखि बिटुमिन छर्ने, धूलो उठाउने र कालोपत्र गर्ने काम शुरू गरिएको छ भने माथिल्लो खण्डमा धमाधम कालोपत्र भइरहेको छ ।’ उक्त खण्डको बोक्सेमा भने पहिरो र पानीको मुहानका कारण ३०० मिटर सडक ढलान भइरहेको छ ।
लोकमार्ग अन्तर्गत जिल्ला सदरमुकाम खण्डको २५ किलोमिटरबाहेक अन्य सडक कालोपत्र भइसकेको छ । मध्यपहाडी पुष्पलाल राजमार्गको बागलुङ बजार उपल्लाचौर–अक्षेते–बिहुँ खण्ड र बिहुँ घोडाबाँधे सडकखण्डको २५ किलोमिटर सडक दुई खण्डमा विभाजन गरेर ठेक्का सम्झौता गरिएको थियो ।
उपल्लाचौरदेखि अक्षेते–बिहुँ खण्ड २०७३ माघ १४ गते भारत/सिद्धिसाई जेभीले १३ किलोमिटर र बिहुँ घोडाबाँधे खण्ड २०७२ माघ १० गते एमपी/एससीएफ/ईसीसी जेभीले १२ किलोमिटर सडक दुई वर्षमा कालोपत्र गर्ने ठेक्का सम्झौता गरेको थियो । कुल एक हजार ७७६ किलोमिटर लोकमार्गको बागलुङ खण्डमा मात्र १४२ किलोमिटर पर्छ । यो सडकखण्डमा २५ किलोमिटर मात्र कालोपत्र गर्न बाँकी छ । रासस
