काठमाडौं । राष्ट्रिय बीमा संस्थानले काठमाडौंमा आयोजना गरेको ‘जीवन बीमा अभिकर्ता पुनर्ताजगी तालीम तथा अन्तरक्रिया कार्यक्रम’ शनिवार सम्पन्न गरेको छ । कार्यक्रममा ‘जीवन बीमा र व्यावसायिक सफलता’ विषयमा प्रस्तुति दिँदै प्राइम लाइफका पूर्व प्रमुख कार्यकारी अधिकृत मनोजकुमार भट्टराईले बीमा अभिकर्ता बीमा व्यवसायको मेरुदण्ड भएको बताए ।
संस्थानका प्रशासक कविप्रसाद पाठकले व्यवसायलाई कसरी स्वस्थ ढंगले अगाडि बढाउने भन्नेमा अभिकर्ताको भूमिकाको चर्चा गरे । अभिकर्ता पेशालाई व्यावसायिक बनाउँदै उनीहरूको जीवनस्तरमा सकारात्मक परिवर्तन गर्ने र कम्पनीको व्यवसाय समेत प्रवर्द्धन गर्ने नीतिअनुरूप कार्यक्रम गरिएको उनले बताए । कम्पनीका शाखा तथा बजार व्यवस्थापन विभागमा प्रमुख दीपा अधिकारीले बीमा क्षेत्रको विद्यमान अवस्था र संस्थानको विद्यमान अवस्थाका बारेमा प्रस्तुति दिएकी थिइन् । संस्थानका वरिष्ठ अभिकर्ता हरिशरण शिवाकोटीले अहिले बजारलाई आवश्यक भइरहेको दक्ष अभिकर्ताको उत्पादन गर्नु अहिलेको आवश्यकता भएको बताएका थिए ।
