काठमाडौं । एक महीनाभन्दा बढी समययता अमेरिकी अनुसन्धान कम्पनी हिन्डेनबर्ग रिसर्च र भारतीय व्यापारिक घराना अदानी समूहबीचको जुहारी जारी छ । हिन्डेनबर्गले भारतीय अर्बपति व्यापारी गौतम अदानीको सो समूहभित्र शेयर चलखेल र वित्तीय अनियमितता लगायत आरोप लगाउँदै एउटा प्रतिवेदन सार्वजनिक गरेयता समूहको शेयरमा पहिरो जाने क्रम जारी छ । यस्तोमा अदानी समूहमा ठूलो लगानी गरेको भारतको सबैभन्दा ठूलो बीमा कम्पनी एलआईसी पनि चपेटामा आएको छ ।
गएको वर्षको डिसेम्बरको अन्त्यसम्ममा अदानी समूहमा एलआईसीको शेयर र ऋण लगानी ३ खर्ब ५९ अर्ब १७ करोड रुपया थियो । अदानी समूहका सबै कम्पनीमा एलआईसीले ३ खर्ब १ अर्ब २७ करोड रुपयाको इक्विटी किनेको थियो ।
गएको जनवरी २७ मा यो लगानीको बजार पूँजीकरण ५ खर्ब ६१ अर्ब ४२ करोड भारतीय रुपैया थियो । तर, फेब्रुअरी २३ मा यो मूल्य घटेर २ खर्ब ७० अर्ब भारतीय रुपयामा झरेको छ । अर्थात् यस अवधिमा एलआईसीलाई उल्टै ३ खर्ब रुपया नोक्सान भएको छ ।
यसैबीच एलआईसीको शेयरमा पनि उच्च कमी आएको छ । बीएसई इन्डेक्समा गएको शुक्रवार प्रतिकित्ता शेयरको भाउ ५८४ रुपया ६५ पैसामा आएर बन्द भएको थियो । यो महीनाको शुरुमा शेयर कीर्तिमानी न्यून स्तर ५८२ रुपया ४५ पैसामा आएको थियो ।
हिन्डेनबर्गको रिपोर्ट सार्वजनिक भएयता एलआईसीको शेयर मूल्य १७ प्रतिशतले घटिसकेको छ । महीनभरमा कम्पनीको बजार पूँजीकरण पनि ७ खर्ब ५० रुपया गुमिसकेको छ ।
जनवरी २४ मा एलआईसीको बजार पूँजीकरण ४४ खर्ब ४१ अर्ब ४१ करोड भारतीय रुपया थियो । फेब्रुअरी २४ मा यो घटेर ३६ खर्ब ९७ अर्ब ९० करोड भारतीय रुपयामा ओर्लियो । सन् २०२२ को मे १७ मा एलआईसीको शेयर मूल्य प्रतिकित्ता ९२० रुपयाको कीर्तिमानी स्तरमा थियो । अदानी समूहका कारण एलआईसीको शेयर र बजार पूँजीकरणमा आएको कमी र अदानी समूहकै लगानीमा भएको नोक्सानीबारे एलआईसीले भने मुख खोलेको छैन ।
अदानी समूहको कम्पनीमध्ये अदानी पोर्ट्समा एलआईसीको सबैभन्दा धेरै लगानी छ । यसमा एलआईसीको शेयर ९ दशलमव १ प्रतिशत छ । अन्य कम्पनीमा भने शेयर १ दशमलव २५ प्रतिशतदेखि साढे ६ प्रतिशतसम्म छ । एजेन्सी
