सिद्धार्थ राजमार्गअन्तर्गत तानसेनबाट बुटवलको दूरी ३९ किलोमिटर मात्रै हो । तर, पछिल्ला वर्षमा यही सडकमा यात्रा गर्न कम्तीमा तीन घण्टा लाग्छ । हिउँद होस् वा वर्षायाम, जहिलेसुकै सास्ती खेपेर यात्रा गर्न यात्रु बाध्य छन् । १० वर्षदेखि सिद्धार्थ राजमार्गको तानसेन–बुटवल सडक खण्डमा यात्रा गर्ने यात्रुले दैनिक सास्ती भोग्नु पर्ने नियतिजस्तै बनेको छ । यात्रुले कम्तीमा दुईदेखि तीन घण्टा जाम, वर्षायाममा हिलो, हिउँदमा धुलोधूँवाको हैरानी खेप्दै आएका छन् ।
