विराटनगर (अस) । भारतको रेलवे विभागले आगामी असारदेखि मोरङको बुधनगरसम्म मालबाहक रेल चलाउने तयारी थालेको छ । एकीकृत जाँच चौकी (आईसीपी) सम्म रेलको पटरी बिछ्याएर रेलवे लाइनको जाँचपास समेत भइसकेकोले रेल चल्न सक्ने स्थिति बनेको हो ।
रेल सञ्चालनको तयारीको क्रममा एनएफ रेलवे कटिहार मण्डलका डीएमएम कर्नल एसके चौधरीले आइतबार बथनाहादेखि बुधनगरसम्मको रेलवे लाइन विस्तारको कामको निरीक्षण गरेका थिए । उनले आगामी जुलाई (असार) सम्ममा रेल चलाउने तयारी भइरहेको बताएका थिए ।
भारतको बथनाहाबाट मोरङको कटहरीसम्म १८ किलोमिटरमा भारतले रेलवे लाइन विस्तार थालेकोमा मुआब्जाको विषयमा अदालतमा मुद्दा परेपछि कटहरीसम्म काम हुन सकेको छैन । सो कामको लागि नेपालतर्फबाट भइरहेको ढिलाइप्रति भारतले असन्तुष्टि जनाएको छ ।
जारी कामको प्रगति विवरण लिन र थप तयारीका लागि निर्देशन दिन शनिबार पूर्वाेत्तर सीमा रेल गुहाटी माली गाउँका महाप्रबन्धक अंशुल गुप्ता कटिहार–जोगबनी रेल खण्डको निरीक्षणमा आउँदै छन् । उनले कटिहारबाट सीमाञ्चल एक्सप्रेसको स्पेशल बोगीबाट जोगबनीसम्म निरीक्षण गर्दैछन् । उनीसँग रेलवे विभागको उच्चस्तरीय प्राविधिक टोली पनि सो क्षेत्रको जानकारी लिन र रेल सञ्चालनको तयारी गर्न आउँदैछ ।
