ब्याज वृद्धिले बढेन निक्षेप

काठमाडौं । तरलता अभावको कारण देखाउँदै बैंक तथा वित्तीय संस्थाहरूले निक्षेपको ब्याजदर वृद्धि गरे पनि निक्षेप भने बढ्न सकेको छैन । फागुन महीनादेखि बैंकहरूले निक्षेपको ब्याजदर ११ दशमलव शून्य ३ प्रतिशत पुर्‍याए पनि फागुनको पहिलो साता वाणिज्य बैंकहरूको निक्षेप भने १ अर्ब रुपैयाँले मात्र वृद्धि भएको छ । माघ मसान्तसम्म वाणिज्य बैंकहरूमा कुल निक्षेप ४३ खर्ब ११ अर्ब रुपैयाँ रहेकोमा फागुन ६ गतेसम्ममा ४३ खर्ब १२ अर्ब रुपैयाँ पुगेको नेपाल बैंकर्स संघले जानकारी दिएको छ । वाणिज्य बैंकहरूले फागुनदेखि निक्षेपको ब्याजदर मुद्दती निक्षेपको अधिकतम ब्याजदर ११ दशमलव शून्य ३ प्रतिशत पुर्‍याएका छन् । ब्याजदर वृद्धिले मात्र निक्षेप नबढ्ने भन्दै केही बैंकरहरूले विरोध गरे पनि संघले राष्ट्र बैंकले जारी गरेको ब्याजदरसम्बन्धी निर्देशनअनुसार ब्याजदर बढाउने निर्णय गरेको थियो । निक्षेपको वृद्धिदर कमजोर भएपछि बैंकहरूको कर्जा विस्तार पनि खुम्चिन थालेको छ । फागुनमा बैंकहरूको कर्जा ४ अर्ब रुपैयाँले मात्र वृद्धि भएको संघले बताएको छ । वाणिज्य बैंकहरूले सातामा औसत १० अर्ब रुपैयाँ कर्जा विस्तार गर्दै आएका बैंकहरू पुस लागेसँगै कर्जा प्रवाह घटाउन थालेका छन् । बैंकहरूले चालू आवको माघमसान्तसम्ममा वाणिज्य बैंकहरूको निक्षेप १ खर्ब १० अर्ब रुपैयाँ विस्तार हुँदा कर्जा प्रवाह भने ४ खर्ब ३४ अर्ब रुपैयाँले वृद्धि भएको छ । निक्षेप वृद्धिको तुलनामा कर्जा प्रवाह अत्यधिक भएको र अधिकांश कर्जा आयातलगायत अनुत्पादक क्षेत्रमा जाँदा तरलता अभाव हुँदै आएको छ ।