तलब, तिमी आउने दिन त मन यति फुरुङ्ग हुन्छ कि कुरै छाडौँ । नयाँ पाइन्ट किन्न पाइन्छ भनेर आफू दङ्ग । नातेदार वा साथीभाइको विवाहमा लगाउन पार्टी सुज किन्न पाइन्छ भनेर श्रीमती दङ्ग । बाउले फिजेट स्पिनर किनिदिन्छन् भनेर पाँचवर्षे छोरो दङ्ग । पसलको उधारो तिर्दिन्छ भनेर हजुरबा दङ्ग । डिस टिभी रिचार्ज गर्दिन्छ भनेर बुवा दङ्ग । सबै जना दङ्ग हुने दिन, महिनाको अन्तिम दिन अर्थात् तिमी आउने दिन ।
