फागुन २, काठमाडौं । युनिक नेपाल लघुवित्त वित्तीय संस्थाले चालू आवको ६ महीना (दोस्रो त्रैमास) को वित्तीय विवरण सार्वजनिक गरेको छ । उक्त वित्तीय विवरण अनुसार कम्पनीको नाफा गत आवको दोस्रो त्रैमासको तुलनामा चालू आवको सोही अवधिमा १११ प्रतिशत वृद्धि भएको छ ।
कम्पनीले गत आवको दोस्रो त्रैमाससम्ममा रू. ३ करोड ४१ लाख नाफा कमाएकोमा चालू आवको सोही अवधिमा वृद्धि भएर रू. ७ करोड २० लाख पुगेको हो । चालू आवको दोस्रो त्रैमासमा कम्पनीको खुद ब्याज आम्दानी र सञ्चालन नाफामा वृद्धि भएकाले नाफा बढ्न टेवा पुगेको हो ।
साथै कम्पनीले रू. ५ करोड २ लाख खराब कर्जा संकलन गर्न कम्पनी व्यवस्थापन सफल भएकाले पनि नाफा बढ्न सहयोग पुगेको हो । खुद ब्याज आम्दानी गत आवको दोस्रो त्रैमासको तुलनामा चालू आवको सोही अवधिमा १३ प्रतिशत र सञ्चालन नाफा ५० दशमलव ४९ प्रतिशत वृद्धि भएको छ ।
कम्पनीको चुक्तापूँजी रू. ११ करोड ६ लाख रहेको छ भने जगेडामा रू. २५ करोड १४ लाख सञ्चित गरेको छ । त्यसैगरी कम्पनीले चालू आवको दोस्रो त्रैमाससम्ममा रू. ९५ करोड २ लाख सापटी लिएर रू. २ अर्ब २९ करोड निक्षेप संकलन गरेर रू. ३ अर्ब ८८ करोड कर्जा लगानी गरेको हो ।
सो अवधिमा कम्पनीको प्रतिशेयर आम्दानी रू. ९३ दशमलव ८३, मूल्य आम्दानी अनुपात ५ दशमलव शून्य २ गुणा, तरलता अनुपात ३ दशमलव ९३ प्रतिशत र प्रतिशेयर नेटवर्थ रू. ४७१ दशमलव ३९ रहेको छ ।
