जेठ १३, काठमाडौं । नेपाल राष्ट्र बैंकले शुक्रवार चालू आर्थिक वर्षको तेस्रो त्रैमासिक समीक्षा प्रतिवेदन सार्वजनिक गरेको छ । समीक्षाअनुसार बैंकले मौद्रिक नीति यथावत् राखेको छ ।
‘मौद्रिक नीतिको उपर्युक्त कार्यदिशा अनुरुप विद्यमान अनिवार्य नगद अनुपात, वैधानिक तरलता अनुपात, बैंक दर र पुनर्कर्जा दरहरुलाई यथावत राखिएको छ,’ समीक्षमा भनिएको छ । मूल्य र बाह्य क्षेत्र स्थायित्वमा देखा परेको दबाब यथावत रहेकोले मौद्रिक नीतिको अर्द्धवार्षिक समीक्षामा लिइएको कार्यदिशालाई निरन्तरता दिएको हो ।
समीक्षामा ब्याजदर बढ्न सक्ने संकेत गरिएको छ । मुद्रास्फीति तथा विदेशी विनिमय सञ्चितिको आयात धान्ने क्षमतामा दबाब पर्दै गएमा मौद्रिक नीतिको कार्यदिशालाई थप कसिलो बनाउँदै लगिने पछिल्लो प्रतिवेदनमा भनिएको छ ।
आन्तरिक तथा बाह्य क्षेत्रमा विद्यमान दबाव कम गरी समष्टिगत आर्थिक स्थायित्व कायम गर्न ब्याजदरसहित अन्य उपकरणको प्रयोग गरिने पनि बैंकले बताएको छ । बैंकले कोभिड संक्रमणका कारण प्रभावित उद्योग व्यवसायको पुनरुत्थानका लागि प्रदान गर्दै आएको पुनर्कर्जा सुविधालाई सुविधालाई पुनरुत्थान हुँन बाँकी रहेका अतिप्रभावित क्षेत्रमा सीमित गर्दै लैजाने नीतिलाई समेत निरन्तरता दिएको छ ।
बैंकले शेयर बजारमा राखेको प्रावधानहरु समेत चलाएको छैन । विश्वव्यापी रुपमा भइरहेको वस्तु तथा इन्धनको मूल्यवृद्धि र सार्वजनिक यातायातको भाडादरमा गरिएको समायोजनलगायत कारणले नेपालमा मूल्यमा चाप पर्न गएको समीक्षामा भनिएको छ । वार्षिक विन्दुगत आधारमा २०७७ को चैतमा ३ दशमलव १ प्रतिशत रहेको मुद्रास्फीति २०७८ को चैतमा ७ दशमलव २८ प्रतिशत पुगेको छ ।
खाद्य तथा पेय पदार्थ समुहको मूल्य वृद्धिदर समीक्षा अवधिमा ७ दशमलव ४ प्रतिशत पुगेको छ भने गैरखाद्य तथा सेवा समुहको मूल्य वृद्धिदर पनि अघिल्लो वर्षको २ दशमलव ७९ प्रतिशतबाट बढेर समीक्षा अवधिमा ७ दशमलव १८ प्रतिशतमा पुगेको छ ।
कोभिड संक्रमणले विश्व आपूर्ति व्यवस्थामा ल्याएको अवरोध, रसिया–युक्रेनबीचको युद्ध लगायतका कारण अन्तर्राष्ट्रिय बजारमा पेट्रोलियम पदार्थ र वस्तु तथा सेवाको मूल्यमा वृद्धि भइरहेको छ । यसर्थ, आन्तरिक मूल्यमा विद्यमान चापको स्थिति केही समयसम्म कायमै रहने देखिने समीक्षामा बताइएको छ ।