वैशाख १९, काठमाडौं । लुम्बिनी जनरल इन्स्योरेन्स कम्पनी लिमिटेडेले गत माघ मै प्रस्ताव गरेको लाभांश पारितका लागि हालसम्म मिति तय गर्न सकेको छैन ।
कम्पनीले माघ २८ गते गत आर्थिक वर्ष ०७७/७८ को सञ्चित मुनाफाबाट हाल कायम चुक्तापूँजी रू. १ अर्ब १९ करोड ९९ लाख ९० हजारको आधारमा कुल १० प्रतिशत लाभांश दिने निर्णय गरेको थियो ।
कम्पनीले कुल लाभांशमध्ये ९ दशमलव ५२ प्रतिशत बोनस शेयर र कर प्रयोजनका लागि शून्य दशमलव ४८ प्रतिशत नगद लाभांश वितरणको प्रस्ताव गरेको हो ।
प्रस्तावित लाभांशसहितको गत आर्थिक वर्षको वित्तीय विवरण बीमा समितिबाट स्वीकृति गराइसकेको कम्पनीले केहि प्राविधक कारण वार्षिक साधारण सभाको मिति तय गर्न नसकेको जानकारी दिएको छ ।
कम्पनीका प्रमुख कार्यकारी अधिकृत नुर प्रकाश प्रधानले बीमा समितिले वार्षिक साधारण सभाको बाटो खोलिदिए पनि पूँजीवृद्धिको योजनाका कारण केहि थप गृहकार्य बाँकी रहेकाले वार्षिक साधारण सभा गर्न ढिलाइ भइरहेको बताए ।
बीमा समितिका कार्यकारी निर्देशक राजुरमण पौडेलले पनि लुम्बिनी जनरल इन्स्योरेन्सको वार्षिक प्रतिवेदन सहितका वित्तीय विवरण वार्षिक साधारण सभामार्फत पारित गर्न स्वीकृति प्रदान गरिसकेको बताए । कम्पनीले वार्षिक साधारण सभाका लागि समय थपको माग समितिमार्फत राखेको जानकारी समेत उनले दिए ।
आगामी दिनमा पूँजीवृद्धिका लागि आवश्यक विषयहरु थप गर्ने तयारीका लागि कम्पनीले वार्षिक साधारण सभाको मिति तय गर्न नसकेको अनुमान पौडेलले लगाए ।
यस वर्ष कम्पनीले गत वर्षकै अनुपातमा लाभांश वितरण गर्न लागेको हो । गत वर्ष भने कम्पनीले ५ प्रतिशत बोनस शेयर र कर समेत ५ प्रतिशत नगद लाभांश गरी कुल १० प्रतिशत लाभांश वितरण गरेको थियो । गत वर्ष कम्पनीले जेठ २८ गते १६औं वार्षिक साधारण सभा सम्पन्न गरेको थियो । गत वर्ष कोभिडको जोखिमका बिच कम्पनीले भर्चुअल माध्यमबाट उक्त सभा सम्पन्न गरेको थियो ।
कम्पनीको लाभांश वितरणको इतिहासलाई फर्केर हेर्दा १९ दशमलव १४ प्रतिशतसम्म लाभांश वितरण गरेको अवस्था छ । आर्थिक वर्ष ०७२/७३ को सञ्चित मुनाफाबाट कम्पनीले हालसम्मकै उच्च लाभांश वितरण गरेको थियो ।
धितोपत्र दोस्रो बजारमा कम्पनीको अन्तिम शेयरमूल्य सोमवार प्रतिकित्ता रू. ६३० कायम भएको छ । यस दिन न्यूनतम रू. ६२५ दशमलव १० सम्म झरेको कम्पनीको शेयरमूल्य अधिकतम रू. ६४३ सम्म पुगेको थियो । यस दिन कम्पनीको रू. २३ लाख ८७ हजार बराबरको ३ हजार ७७५ कित्ता शेयर खरीदविक्री भएको छ ।
