विराटनगर (अस) । प्रदेश १ का नवनियुक्त मुख्यमन्त्री राजेन्द्र राई तथा अन्य मन्त्रीहरूले पद तथा गोपनीयताको शपथ लिएका छन् । उनले शपथ लिएलगत्तै सञ्चारकर्मीसँग प्रदेशको नामकरण गर्ने र बजेटको दायरा बढाउने प्रतिक्रिया दिएका छन् । उनले नराम्रो काम नगर्ने राम्रो कामलाई प्राथमिकता दिने बताए ।
प्रदेश प्रमुख सोमनाथ अधिकारी ‘प्यासी’ले प्रदेश प्रमुखको कार्यालयमा मुख्यमन्त्री र मन्त्रीहरूलाई पद तथा गोपनीयताको शपथ गराएका हुन् । नेकपा एमालेबाट विभाजित भएर बनेको नेकपा एकीकृत समाजवादी संसदीय दलको नेता राईलाई गठबन्धनका तर्फबाट मुख्यमन्त्री पदमा नियुक्त गर्न प्रस्ताव गरिएको थियो । मुख्यमन्त्री राईले गठबन्धन दलहरूमध्ये नेपाली कांग्रेसबाट दुई र अन्य दलबाट एकएक जनालाई समेटेर ६ सदस्यीय मन्त्रिपरिषद् गठन गरेका छन् । मुख्यमन्त्री राईले नेपाली कांग्रेस संसदीय दलका नेता हिमाल कार्कीलाई भौतिक पूर्वाधार विकास मन्त्री, नेकपा माओवादी केन्द्र संसदीय दलका नेता इन्द्रबहादुर आङ्बोलाई आर्थिक मामिला तथा योजना मन्त्री, कांग्रेसका प्रमुख सचेतक केदार कार्कीलाई आन्तरिक मामिला तथा कानून मन्त्री, जनता समाजवादी पार्टी नेपाल संसदीय दलका नेता जयराम यादवलाई सामाजिक विकास मन्त्री, संयुक्त लोकतान्त्रिक राष्ट्रिय मञ्चकी सांसद विष्णुमाया तुम्बाहाम्फेलाई सामाजिक विकास राज्यमन्त्री नियुक्त गरेका हुन् ।