एक वर्षमा होटल तथा पर्यटन समूहको परिसूचक ११९ % बढ्यो

काठमाडौं । एक वर्षको अवधिमा होटल तथा पर्यटन समूहको परिसूचक सबैभन्दा बढी ११९ दशमलव १९ प्रतिशत वृद्धि भएको छ । २०२२ जुलाई १३ मा २ हजार ६५० दशमलव ६८ रहेकोमा २०२३ जुलाई १३ मा बढेर ५ हजार ८१० दशमलव ०१ पुगेको छ । एक वर्षमै यस समूहका लगानीकर्ताले राम्रो प्रतिफल प्राप्त गरेका छन् । कोरोना महामारीको असर सकिएपछि होटल तथा पर्यटन क्षेत्रका कम्पनीहरू नाफामा छन् । सोही कारण यस्ता कम्पनीहरूमा पनि लगानीकर्ताहरू ढुक्क भएर लगानी गरिरहेका छन् । फलस्वरूप होटल तथा पर्यटन समूहका कम्पनीको शेयर मूल्य उच्च दरले वृद्धि भएको हो ।  पछिल्लो एक वर्षमा समूहगत परिसूचक बढ्ने सूचीमा दोस्रोमा निर्जीवन बीमा समूह छ । सो समूहको परिसूचक एक वर्षमा ४० दशमलव ४४ प्रतिशत वृद्धि भएको छ । बीमा प्राधिकरणले निर्जीवन बीमा कम्पनीलाई चुक्ता पूँजी रू. २ अर्ब ५० करोड पुर्‍याउन निर्देशन दिएको छ । कतिपय कम्पनीले मर्जर गरेर तोकेको पूँजी पुर्‍याए भने केही हकप्रद शेयर र बोनस शेयरमार्फत योजनामा छन् । यस कारण पनि यस समूहका कम्पनीमा लगानीकर्ताको आकर्षण परेको हो ।  १३ समूहगत परिसूचकमध्ये बैंकिङ् र लघुवित्त समूहको परिसूचक घटेको छ । बैंकिङ्ग समूहको परिसूचक ८ दशमलव ९० प्रतिशत र लघुवित्त समूहको ७ दशमलव ३३ प्रतिशत घटेको हो । नेपाल राष्ट्र बैंकले लघुवित्त कम्पनीहरूलाई १५ प्रतिशतभन्दा बढी लाभांश प्रस्ताव गर्दा ९५ प्रतिशतसम्म विभिन्न कोषमा छुट्याउनु पर्ने प्रावधान ल्याएसँगै शेयर मूल्य ओरालो लागेको हो । त्यस्तै वाणिज्य बैंकको हकमा मर्जर तथा प्राप्तिपछि पूँजी धेरै छ भने लाभांशदर पनि घट्दै गएको छ । यस कारण लगानीकर्ताको रोजाईमा नपरेको देखिन्छ ।