पुस १३, चरिकोट(दोलखा) । विगत ६ वर्षदेखि अलपत्र दोलखाको लाइफ लाइन सडक मुडे–चरिकोट सडक खण्डको काम ठेकेदार कम्पनीले फेरी शुरु गरेको छ ।
स्थानीय नागरिकहरुको आन्दोलनको निरन्तर दवाब तथा सडक निर्माण आयोजनाले ठेक्का तोड्ने अन्तिम तयारी गरेपछि ठेकदार कम्पनीले पुनः सडक निर्माणको काम शुरु गरेको हो । भारतीय ठेकेदार कम्पनी सकिल हैदर तथा नेपाली कम्पनीहरु शंकर माली तथा सुनौले खिम्तीमध्ये साझेदार कम्पनी सुनौलो खिम्तीले सडक निर्माणको काम पुनः शूरु गरेको सुनौलो खिम्तिका ठेकेदार भीमसेन भण्डारीले आर्थिक अभियानलाई बताए ।
विभिन्न कारणले सझेदारहरु बीच कुरा मिल्न नसक्दा मुडे–चरिकोट सडक खण्ड लामो समयदेखि स्तरोन्नति हुन नसकेपछि अब यो आर्थिक वर्षभित्र आफूले जसरी पनि काम सम्पन्न गर्ने उनले बताए । आर्थिक व्यवस्थापनसहित आफू काममा फर्किएको पनि उनले बताए ।
करीब १५ किलोमिटर सडकको खाल्टा खुल्टी पुर्ने काम सम्पन्न गरिसकेको तथा करीब ५ किलोमिटरलाई पुग्ने बेस तथा सबबेश तयार गरेको उनको दवी छ । तीन ओटा एक्जाभेटर, १२ ओटा ट्रिपर एउटा रोलर, एउटा ग्रेडर, दुई ओटा मिक्सचर तथा दुई पानी ट्याङ्कीसहितका इक्युपमेन्ट अहिले फिल्डमा रहेको उनले जानकारी दिए । क्रसर मर्मत पश्चात पूर्ण क्षमतामा सञ्चालन भइरहेको भण्डारीले बताए ।
“पुराना स्टाफहरु अहिले काममा फर्किएका छन् । तिर्नु पर्ने ठाउँहरुमा आँशिकरुपमा भुक्तानी दिएको छु । मेरो मूल पेशा नै यही ठेकेदारी हो । नाफा नोक्सान जे भएपनि माघबाट पिच शुरु गरी यो आर्थिक वर्ष भित्र सबै काम सक्छु ।”
ठेकेदार कम्पनीले विगतमा आँखामा छारो हाल्ने काम मात्र गरेकोले दोलखाका स्थानीयहरु तथा सडक निर्माण आयोजना भने ठेकेदार कम्पनीले काम गर्छ भन्ने कुरामा विश्वस्त हुन सकेका छैनन् । वर्षामा हिलाम्य र हिउँदमा धुलाम्य सडक बनाएर दोखालीलाई चरम सास्ति भोगाएका ठेकेदार कम्पनीले सडक निर्माण गर्छन् भनेर पत्याउने अवस्था नरहेको सदरमुकाम चरिकोटका स्थानीयहरुको भनाइ छ ।
ठेकेदार कम्पनीले काम सम्पन्न गर्ने बलियो आधार नदेखिएकोले ठेक्का तोड्नकालागि आफूले सम्बन्धित निकायमा कागजातहरु पठाइ सकेको खाडिचौर–जिरी सडक निर्माण आयोजनाका प्रमुख कृष्ण पन्तले बताए ।भरपर्दो आर्थिक विकल्प सहित ठेक्का तोड्नकालागि आयोजनाले विभागलाई सिफारिस गरिसकेको उनको भनाइ छ ।
भारतीय एक्जिम बैंकको लगानीमा सडक विस्तार तथा स्तरोन्नतिको काम भइरहेको लामोसाँघु–जिरी सडक अन्तर्गतको मुडे–चरिकोट खण्ड ठेकेदारले काम नगरेका कारण ६ वर्षयता अलपत्र छ । उक्त सडक खण्डको निर्माणको जिम्मा भारतीय कम्पनी सकिल हैदर—शंकरमालि—सुनौलो खिम्ती जेभीले २०७२ सालमा भ्याट बाहेक ७० करोड रुपैयाँमा सम्झौता गरेका थिए । चार दशकअघि स्वीस सरकारको सहयोगमा लामोसाँघु—जिरी ११० किलोमिटर एकतर्फी सडक बनेको थियो ।
सवारी चाप बढ्दै गएपछि भारतीय एक्जिम बैंकको सहयोगमा ७ वर्षअघि सडक सुधार गरी दुई लेनको बनाउन काम शुरु भएको थियो । लामोसाघु–मुडे सडक खण्डको स्तरोन्नति तथा निर्माण सम्पन्न भइसकेको छ भने चरिकोट–जिरी सडक खण्डको स्तरोन्नतिको काम जारी छ ।