काठमाडौं । बोटलर्स नेपाल तराई र बोटलर्स नेपाल बालाजुले चालू आर्थिक वर्ष तेस्रो त्रैमासिक वित्तीय विवरण सार्वजनिक गरेका छन् ।
विवरणअनुसार गत आवको तेस्रो त्रैमासको तुलनामा चालू आवको सोही अवधिमा दुवै कम्पनीको नाफा घटेको छ । गत आवको तुलनामा चालू आवमा बोटलर्स नेपाल तराईको नाफा २८ दशमलव ६२ प्रतिशत र बोटलर्स नेपाल बालाजुको नाफा ९ दशमलव ५३ प्रतिशत घटेको हो ।
बोलटर्स नेपाल तराईले गत आवमा रू. ५० करोड ५८ लाख नाफा कमाएकोमा चालू आवमा रू. ३६ करोड १० लाखमा झरेको छ । चालू आवमा उत्पादनको विक्री लागतमा वृद्धि, वितरण खर्च, प्रशासनिक खर्चलगायतमा वृद्धि भएपछि सञ्चालन नाफा घटेको छ । कम्पनीको सञ्चालन नाफा गत आवमा रू. ८८ करोड ४० लाख रहेकोमा चालू आवमा घटेर रू. ५८ करोड ८८ लाखमा झरेको छ । यस कारण खुद नाफा पनि प्रभावित भएको हो ।
कम्पनीले चालू आवको तेस्रो त्रैमाससम्म उत्पादन विक्रीबाट रू. ६ अर्ब ७ करोड आम्दानी गरेको छ । यो आम्दानी गत आवको तेस्रो त्रैमाससम्म रू. ५ अर्ब ६६ करोड थियो । कम्पनीको चुक्तापूँजी रू. १२ करोड १० लाख रहेको छ । कम्पनीले जगेडा तथा कोषमा रू. ३ अर्ब ५८ करोडभन्दा बढी सञ्चित गरेको छ । नाफा घटेसँगै प्रतिशेयर आम्दानी पनि घटेको छ । गत आवमा कम्पनीको प्रतिशेयर आम्दानी रू. ४१८ रहेकोमा चालू आवमा रू २९८ मा झरेको छ ।
बोटलर्स नेपाल बालाजुले गत आवमा रू. ४८ करोड १३ लाख नाफा कमाएकोमा चालू आवमा रू. ४३ करोड ५४ लाखमा सीमित भएको हो । चालू आवमा यस कम्पनीको पनि विक्री लागत, वितरण खर्च र प्रशानिक खर्च बढेपछि सञ्चालन नाफा घटेसँगै नाफा प्रभावित भएको हो ।
गत आवमा कम्पनीको सञ्चालन नाफा रू. ९७ करोड रहेकोमा चालू आवमा रू. ६५ करोड ९३ लाखमा झरेको छ । त्यस्तै कम्पनीको उत्पादन विक्रीबाट गत आवमा रू. ५ अर्ब ६६ करोड आम्दानी भएकोमा चालू आवमा रू. ६ अर्ब ७ करोड भएको छ ।
कम्पनीको नाफा घटेसँगै प्रतिशेयर आम्दानी पनि घटेको छ । गत आवमा कम्पनीको प्रतिशेयर आम्दानी रू. २२३ रहेकोमा चालू आवमा रू. २०६ मा झरेको हो । कम्पनीको चुक्तापूँजी रू. १९ करोड ४८ लाख रहेको छ । कम्पनीले जगेडामा रू. ५ अर्ब ३६ करोड सञ्चित गरेको छ ।
बोटलर्स नेपाल तराईको रिपोर्ट हेर्न यहाँ क्लिक गर्नुहोस्
बोटलर्स नेपाल बालाजुको रिपोर्ट हेर्न यहाँ क्लिक गर्नुहोस्