एलआईसीको आईपीओको आकार ४० % ले घटाउँदै भारत

वैशाख ९, नयाँ दिल्ली (भारत) । भारतले सरकारी बीमा कम्पनी लाइफ इन्सुरेन्स कर्पोरेशन (एलआईसी) ले प्राथमिक शेयर(आईपीओ) निष्कासनमार्फत ३ खर्ब रुपया उठाउन खोजेको छ । यो यसअघि अनुमान गरिएको भन्दा झन्डै ४० प्रतिशत कम हो । युक्रेनमाथि रुसले आक्रमण गरेपछि मूल्यांकन र माग घटेकोतर्फ औंल्याउँदै अधिकारीहरुले आईपीओको अनुमानित आकार कम गरेका हुन् । अधिकारीहरुले कम्पनीको सूचिकरण आगामी २ हप्तामा सम्पन्न गराउन खोजेका छन् । आईपीओको अनुमानित आकार घटेपनि यो भारतको सबैभन्दा ठूलो आईपीओ हुनेछ । आईपीओपछि एलआईसीको मूल्यांकन ६० खर्ब रुपयाँ आसपास हुने बताइएको छ । प्रधानमन्त्री नरेन्द्र मोदी नेतृत्वको सरकारले कम्पनीको ७ प्रतिशतसम्म शेयर बेचेर ५ खर्ब रुपया सम्म उठाउन खोजेको थियो । तर लगानीकर्ताहरुबाट आईपीओको माग धेरै नभएकोले सरकारले ५ प्रतिशतभन्दा थोरै बढी शेयर मात्रै विक्रीका लागि राख्न लागेको छ । आईपीओबाट उठाइने रकमले पेटीएम सञ्चालक वन ९७ कम्युनिकेशन्स लिमिटेडको आईपीओलई उछिन्नेछ । नोभेम्बरमा जारी गरिएको पेटीएमको आईपीओमा १ खर्ब ८३ अर्ब रुपयाँ उठेको थियो । यस वर्षको अहिलेसम्मको अवधिमा भारतीय कम्पनीहरुले आईपीओमार्फत १ अर्ब १० करोड डलर संकलन गरिसकेका छन् । यो गत वर्षको सोही अवधिको तुलनामा आधाभन्दा पनि कम हो । एजेन्सी