ताजा जनादेश राजनीतिक निकासको माध्यम भन्दै प्रतिनिधि सभा विघटन गरेका प्रधानमन्त्रीको बुझाइ गलत सावित भइसकेकाले उनले नैतिक रुपमा राजीनामा दिएर संसदलाई निकासको बाटो खोलिदिनुपर्ने संसदमा प्रतिनिधित्व गर्ने दलहरुको निष्कर्ष छ।
“सरकारले असंवैधानिकरुपमा विघटन गरेको प्रतिनिधि सभा सर्वोच्चबाट पुनःस्थापित भएको छ । यसको कांग्रेसले असंवैधानिक र अलोकतान्त्रिक भन्दै वडातहसम्म पुगेर देशव्यापी विरोध गरेको थियो,” कांग्रेस प्रमुख सचेतक बालकृष्ण खाँणले भने।
प्रधानमन्त्रीकै पार्टी नेकपाबाट अदालतको आदेशपछि छुट्टिएको नेकपा माओवादी केन्द्रले प्रधानमन्त्रीका कारण राजनीतिमा मूल्य पद्धति र नैतिकता हुन्छ भन्ने कुरामा प्रश्न उठेको बताएको छ ।
“राजनीतिमा नैतिक मूल्य हुन्छ कि हुँदैन, मूल्य पद्धतिको अलिकति पनि स्थान राजनीतिमा छ कि छैन ?,” माओवादी केन्द्रकी नेतृ पम्फा भुसालले प्रश्न गरिन्, “अहिले पनि जिताहा शैली देखाउने ?"
संसदको चौथो दल जनता समाजवादीले प्रधनमन्त्री र सत्तारुढ दलका गतिविधिले नैतिक मूल्य समाप्त पार्न खोजेको बताएको छ । यस्तै, राष्ट्रिय जनमोर्चा पार्टीले पनि प्रधानमन्त्रीले राजीनामा दिएर संसदलाई स्वाभाविक अभ्यासको बाटो खोलिदिनुपर्ने बताएको छ ।