आज कोरोनाको पछिल्लो वस्तुस्थिति, कोरोना संक्रमणको अवस्था पत्ता लगाउन सातै प्रदेशमा एन्टिबडी परीक्षण गरिने, आजदेखि सोह्रश्राद्ध (पितृपक्ष) सुरु, घरघरै दिवंगत आफन्तको श्राद्ध गरिँदै, श्रीलंकाले अर्को वर्ष बिमस्टेकको शिखर सम्मेलन गर्ने, कोरोनाविरुद्धको खोप विकास र वितरणको विश्वव्यापी प्रयासमा अमेरिका सहभागी नहुने, खमेर रुज जेलका कमान्डर ‘कामरेड डच’ को मृत्यु लगायतका विषयवस्तुहरूलाई समावेश गरिएका छन्।
बुधबार १,१२० जना थपिएसँगै नेपालमा कोरोना संक्रमितको कुल संख्या ४१,६४९ पुगेको छ भने मृत्यु हुनेको संख्या २५१ पुगेको छ।
हालसम्म नेपालमा २३,२९० जना कोरोना संक्रमित निको भएका छन्।
=> PCR परिक्षण : ७,१८,४३९ => क्वारेन्टाइनमा : ६,७७६
सम्बन्धित :
- पछिल्लो २४ घन्टामा कोरोना संक्रमित भई उपचाररत थप १२ जनाको निधन भएको छ। स्वास्थ्य तथा जनसंख्या मन्त्रालयका अनुसार निधन हुनेमा ६ पुरुष र ६ जना महिला छन्। मृत्यु भएकामध्ये काठमाडौं उपत्यकाका पाँचजना छन् । काठमाडौंकी ८९ वर्षीया, ललितपुरकी ७० वर्षीया महिला र काठमाडौंका ७० वर्षीय, ७५ वर्षीय र भक्तपुरका ४० वर्षीय पुरुष छन्।
- देशभरबाट एकैदिन ११ सय १२ जना घर फर्किएका छन्। स्वास्थ्य तथा जनसंख्या मन्त्रालयले बुधबार आयोजना गरेको नियमित पत्रकार सम्मेलनमा पछिल्लो २४ घन्टामा १ हजार १ सय १२ जना डिस्चार्ज भएको जानकारी दिएको हो।
- काठमाडौं उपत्यकामा पछिल्लो २४ घण्टामा ३ सय ८८ कोरोना संक्रमित थपिएका छन्। पछिल्लो २४ घन्टामा काठमाडौंमा ३ सय ५०, ललितपुरमा २९ र भक्तपुरमा ९ संक्रमित फेला परेको बुधबार स्वास्थ्य तथा जनसंख्या मन्त्रालयले जनाएको छ।
- निषेधाज्ञाको स्वरूप परिवर्तन गरी अर्थतन्त्रलाई चलायमान बनाउनुपर्नेमा व्यवसायीहरूले जोड दिएका छन्। लामो समय लकडाउन र निषेधाज्ञा जारी हुँदा अर्थतन्त्रमा ठूलो क्षति पुगेको भन्दै व्यवसायीहरूले निषेधाज्ञाको स्वरूप परिवर्तन गर्नुपर्ने आवश्यकता औँल्याएका हुन्।
- राष्ट्रिय जनस्वास्थ्य प्रयोगशालाले कोरोनाको पीसीआर परीक्षणको रिपोर्ट मोबाइलमा एसएमएसमार्फत पठाउने गरेकोमा पछिल्लो २४ घण्टाका लागि स्थगित गरेको जनाएको छ। प्रयोगशालाका सूचना अधिकारी राजेश कुमार गुप्ताले हस्ताक्षर गरेको सूचना अनुसार कोरोना परीक्षणको नतिजा सक्कल रिपोर्ट प्रयोगशालाको वेबसाइटबाट प्रिन्ट गर्नसक्ने गरी 'युजर नेम' र पासवर्डमा केही समस्या आएको हुँदा २४ घण्टालाई उक्त सेवा रोकिएको उल्लेख छ।
- कोरोना (कोभिड– १९) संक्रमण भएका कतिपय नागरिकलाई समाजमा अपहेलनासहित सामाजिक बहिस्कार गरेका घटना सार्वजनिक भइरहँदा दोलखामा भने कोरोना जितेकाहरूलाई सम्मानपूर्वक बिदाइ गरिएको छ। विभेद गरिएका कतिपय घटनालाई लक्षित गरी यस्ता घटनाको अन्त्य गर्न र संक्रमितको मनोबल उच्च बनाउन सम्मानपूर्वक घर पठाइएको हो। बुधबार दोलखाका सातजना कोरोनामुक्त भई घर फर्किएका छन्।
कोरोना भाइरस नियन्त्रणका लागि भएका निर्णयहरू :
- काठमाडौं उपत्यकामा भदौ २४ गते सम्मका लागि थप गरिएको निषेधाज्ञालाई केही खुकुलो बनाइएको छ। अब होटल/रेस्टुराँमा टेक–अवे तथा होम डेलिभरीको सेवा सञ्चालनको अनुमति सहित बिहान ११ बजेसम्म दैनिक उपभोग्य वस्तु बिक्रीवितरण गर्न दिइने भएको छ। त्यसैगरी विकास निर्माणसँग सम्बन्धित पसल, व्यवसाय साथै छोटो दुरीका ढुवानीका लागि प्रयोग हुने सवारीसाधन दिउँसो २ बजेदेखि बेलुका ७ बजेसम्म सञ्चालन गर्न सकिनेछ तर नेपाल सरकारले तोकेको स्वास्थ्य सम्बन्धी मापदण्ड अनिवार्यरुपमा पालना गर्नुपर्नेछ।
- सरकारले ५०० भन्दा बढी संक्रिय संक्रमित भएका जिल्लाहरुमा निषेषधा र २०० भन्दा बढी संक्रिय संक्रमित भएका जिल्लाहरुमा बन्दाबन्दी गर्न अनुरोध गरेको छ। सकारका अनुसार काठमाडौं, ललितपुरसहित १२ जिल्लामा संक्रिय संक्रमित रहेका छन् ।
- उपत्यकालगायत सातै प्रदेशमा समुदायमा कोरोना भाइरसको संक्रमणको अवस्था पत्ता लगाउन एन्टिबडी परीक्षण गरिने भएको छ। स्वास्थ्य तथा जनसंख्या मन्त्रालयअन्तर्गतको इपिडिमियोलोजी तथा रोग नियन्त्रण महाशाखा (ईडीसीडी)ले विश्व स्वास्थ्य संगठन (डब्लूएचओ) को प्राविधिक सहयोगमा आगामी साताबाट सातै प्रदेशको समुदायमा एन्टिबडी परीक्षण (सेरो प्रिभिलेन्स अध्ययन ) अघि बढाउने तयारी भएको जनाएको छ।
- स्वास्थ्य तथा जनसंख्या मन्त्री भानुभक्त ढकालले तीनै तहका सरकारले मिलेर कोभिड १९ रोकथाम तथा नियन्त्रणको काम थप प्रभावकारी बनाउनुपर्ने बताएका छन्। बुधबार प्रदेश सरकारका सामाजिक विकासमन्त्रीहरुसँग भर्चुअल बैठक गर्दै मन्त्री ढकालले कोभिड १९ रोकथामका लागि भएका कामहरु थप प्रभावकारी र व्यवस्थित बनाउनका लागि तीनै तहले समन्वात्मक काम गर्नुपर्ने बताए।
नेपाल कम्युनिष्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहाल प्रचण्डबीच भेटवार्ता भएको छ। प्रधानमन्त्री निवास बालुवाटारमा भएको छलफलमा राष्ट्रिय सभा सदस्य वामदेव गौतमलाई बनाउने कि डा. युवराज खतिवडालाई निरन्तरता दिनेलगायतका विषयमा छलफल भएको थियो।
रौतहटको माधवनारायणस्थित नगरपालिका २ खेसरहियास्थित हनुमान मन्दिरका पुजारी ६५ वर्षीय श्रीराम साहको हत्या आरोपमा पक्राउ परेका दुईजनालाई प्रहरीले सार्वजनिक गरेको छ। प्रहरीले सार्वजनिक गरेकामा नरेश राउत पटेल र बालकुमार पटेल छन्। पुजारीले आफ्नो रकम फिर्ता मागेपछि हत्या गरिएको प्रारम्भिक अनुसन्धानबाट खुलेकाे छ।
पूर्वाञ्चल विश्वविद्यालय (पूवि)ले ‘टाइम बाउन्ड होम एक्जाम’ परीक्षा सञ्चालन गर्दा क्याम्पस÷कलेज र परीक्षार्थीले पालना गर्नुपर्ने नियम तयार पारेको छ।
नोवेल कोरोना भाइरस (कोभिड–१९)ले गर्दा विद्यार्थीहरू केन्द्रमा उपस्थित भएर परीक्षा दिन नसक्ने भएपछि पूविले वैकल्पिक विधि अर्थात् ‘टाइम बाउन्ड होम एक्जाम’ लिन लागेको हो।
वैदेशिक रोजगारका लागि श्रम स्वीकृति लिन नेपाली दूतावासबाट प्रमाणित भएको रोजगार दाता कम्पनीको नो अब्जेक्सन लेटर (एनओसी) बुझाउनु पर्ने भएको छ।
बुधबार एक सूचना जारी गर्दै वैदेशिक रोजगार कार्यालय ताहाचलले गत वर्ष फागुन २९ गतेअघि मागपत्र प्रमाणित भइ पूर्व स्वीकृति लिएकाको हकमा अन्तिम श्रम स्वीकृति लिनका लागि गन्तव्य मुलुकको सम्बन्धित रोजगारदाता कम्पनीले हालै जारी गरेको 'नो अब्जेक्सन लेटर' नेपाली राजदूतावासबाट प्रमाणित गराई अनिवार्य रुपमा पेश गर्नुपर्ने बताएको हो।
असोज कृष्णपक्षको प्रारम्भसँगै हिन्दू परम्पराको पितृपक्ष आजदेखि सुरु भएको छ। यसअघि वार्षिक श्राद्ध (बरखी) गरिएका दिवंगत परिवारजनलाई सम्झेर तर्पण र पिण्ड दिइने असोज कृष्णपक्षलाई सोह्रश्राद्ध पनि भन्ने गरिन्छ।
मैथिल हिन्दू परम्परामा यो पक्षभरि तीर्थस्थलमा गएर दिवंगतजनको सम्झनामा श्राद्ध गरेर तर्पण, पिण्ड दिने गरिन्छ। यसपटक भने कोभिड– १९ महाव्याधिको संक्रमण छल्न मिथिला क्षेत्रमा जताततै जिल्ला प्रशासन कार्यालयले निषेधाज्ञा जारी गरेको हुँदा घरघरै श्राद्ध गरेर तर्पण, पिण्ड दिने मैथिलहरूले तयारी गरेका छन्।
भारतले पब्जीसहित १ सय १८ वटा चिनियाँ एप्समाथि प्रतिबन्ध लगाएको छ। लद्दाखमा केही दिनयता भारत र चीनबीच तनाव सुरु भएपछि भारतले डाटा सुरक्षाको कारण देखाउँदै थप एक सयभन्दा बढी एप्सहरुमाथि प्रतिबन्ध लगाएको हो।
श्रीलंकाले सन् २०२१ मा बिमस्टेकको पाँचौं शिखर सम्मेलन गर्ने तयारी गरेको छ।
सोहि तयारी अनुसार अर्को वर्षको सुरुआतमा बिमस्टेक मुलुकका परराष्ट्र मन्त्री स्तरीय बैठक हुने भएको छ। नेपालले सन् २०१८ मा काठमाडौंमा विमस्टेकको चौथो शिखर सम्मेलन गरेको थियो।
भारतीय राष्ट्रिय कंग्रेसका नेताहरूलाई पार्टी परित्याग गरेर सत्तारुढ भारतीय जनता पार्टीमा आउन एक केन्द्रीय मन्त्रीले सुझाब दिएका छन्। कंग्रेस पार्टीमा उनीहरूको भविष्य नभएको भन्दै केन्द्रीय मन्त्री रामदास अथावालेले यस्तो सुझाब दिएका हुन्। कंग्रेसका वरिष्ठ नेताहरू गुलाम नबी आजाद र कपिल सिबलले सो पार्टीबाट राजीनामा दिनु उपयुक्त हुने उनको भनाइ छ।
विश्व स्वास्थ्य संगठन (डब्लूएचओ) को अगुवाइमा हुन लागेको कोरोनाविरुद्धको खोपको खोजी, उत्पादन र समान वितरणको विश्वव्यापी प्रयासमा अमेरिका सहभागी नहुने बताएको छ।
विश्व स्वास्थ्य संगठन भएकै कारण अमेरिका कोरोनाविरुद्धको खोप विकास र वितरणको विश्वव्यापी प्रयासमा अमेरिका सहभागी नहुने ट्रम्प प्रशासनले जनाएको छ।
यस आर्थिक वर्षको पहिलो त्रैमासमा भारतको अर्थतन्त्र ऐतिहासिक रूपमा २४ प्रतिशतले संकुचनमा गएको छ। अप्रिलबाट शुरु हुने भारतको आर्थिक वर्ष २०२०–२१ को जुनसम्मका तीनमध्ये दुई महिनामा लकडाउन रहेकाले अर्थतन्त्र २३ दशमलव ९ प्रतिशतले खुम्चिएको त्यहाँको केन्द्रीय तथ्यांक कार्यालयले जनाएको छ।
सिंगापुरका प्रधानमन्त्री ली हिसियन लुङले कोरोना भाइरस प्रकोपको सामना गर्न सरकारबाट गरेको गल्ती स्वीकार गर्दै माफी मागेका छन्।
यीमध्ये महामारीका समयमा भएको एउटा त्रुटि आप्रवासी कामदारहरूसँग सम्बन्धित रहेको जनाइएको छ। महामारीका समयमा समेत एकै कोठामा २० जनाभन्दा बढीलाई राखिएका कारण पनि कोरोना फैलिएको बताइएको छ।
कोभिड-१९ महामारीको घरेलु मामिला घटे पनि बाहिरी मुलुकबाट भित्रिनेको संख्या यथावत् रहेपछि चीनको नागरिक उड्डयन ब्युरोले अन्तर्राष्ट्रिय हवाई उडानमा अझै कडाइ गर्न थालेको छ।
ब्युरोले अन्तर्राष्ट्रिय हवाई उड्डयनका प्रतिउडानमा यात्रुको संख्या ७५ प्रतिशतभन्दा कम हुनुपर्ने नियम जारी गरेको हो। साथै हरेक एअरलाइन्स कम्पनीले सबै यात्रुको कडाइका साथ स्वास्थ्य परीक्षण गर्नुपर्ने आदेश पनि ब्युरोले दोहोर्याएर दिएको छ।
कम्बोडियाको भूतपूर्व खमेर रुज शासकनकालमा कमान्डर रहेका ‘कामरेड डच’ को बुधबार मृत्यु भएको छ। कम्बोडियामा खमेर रुज समूहले सत्ता चलाएका बेला ‘कामरेड डच’ कुख्यात ‘तुओल स्लेङ’ जेलका जेलर रहेका थिए। जहाँ कम्तीमा १४ हजार कम्बोडियाली नागरिकको नरसंहार भएको थियो।
