बन्दीपुरका किसानलाई आलु बिउ वितरण

तनहुँ । तनहुँको बन्दीपुर गाउँपालिकाले किसानलाई ५० प्रतिशत अनुदानमा उन्नत आलुको बिउ वितरण गरेको छ । विभिन्न कृषक समूह, सहकारी, सामूहिक खेती र व्यक्तिलाई समेत गरी ९ हजार ३०० किलोग्राम आलु बिउ वितरण गरिएको हो ।      गाउँपालिकाले एमएस ४२ नीलो र गजुरी रातो उन्नत जातका आलुको बिउ वितरण गरिएको जनाएको छ । विभिन्न व्यावसायिक संस्थामा आबद्ध किसानलाई ५ हजार ३०० र समूह र सहकारीमा आबद्ध किसानलाई ४ हजार किलोग्राम आलुको बिउ वितरण गरिएको हो । प्रतिकिलो ५४ रुपैयाँ पर्ने आलुको बिउमा गाउँपालिकाको ५० प्रतिशत र किसानको ५० प्रतिशत लगानी रहेको गाउँपालिकाका प्रमुख प्रशासकीय अधिकृत महेश सुवेदीले जानकारी दिए ।      गाउँपालिकाभित्रका किसानलाई आवश्यक पर्ने आलुको बिउका लागि सूचना प्रकाशित गरी मागअनुसार बिउ मगाएर वितरण गरिएको गाउँपालिका कार्यालयले बताएको छ ।      गाउँपालिकाका किसानलाई तरकारी खेतीतर्फ आकर्षित गरी आत्मनिर्भर बनाउनुका साथै उनीहरूको आयआर्जन सबल बनाउने प्रयास गर्दै पालिका अध्यक्ष पूर्णसिं थापाले बताए ।      किसानलाई अनुदान, उन्नत बिउ, कृषियन्त्रमा समेत सहयोग गर्दै आएको उनको भनाइ छ । किसानका लागि अनुदानका कार्यक्रम ल्याएपछि थप उत्साहित भएर कृषि पेसामा लाग्न थालेको उनले बताए । गाउँपालिकाभित्रका किसानलाई बाख्रा, कुखुरा, फलफूल तरकारी, दुग्ध उत्पादनलगायत क्षेत्रमा अनुदान प्रदान गरेर उत्प्रेरणा जगाउने कामसमेत गाउँपालिकाले सुरु गरिसकेको छ । रासस