कात्तिक १९, बैतडी । बैतडी र डडेल्धुराका केहि स्थानिय तहले रिक्त दरवन्दीको विवरण लोकसेवा आयोगमा नबुझाएको खुलेको छ ।
ती दुई ओटै जिल्लाका सात ओटा स्थानीय तहले स्थायी कर्मचारी पनि हालसम्म माग गरेका छैनन् । बैतडीका १० ओटा मध्ये चार र डडेल्धुराका सात ओटामध्ये तीन ओटा स्थानीय तहले रिक्त दरबन्दीको विवरण नपठाएको बुझिएको छ ।
बैतडीका डिलाशैनी, दोगडाकेदार, शिवनाथ गाउँपालिका र मेलौली नगरपालिकाले कर्मचारीको रिक्त दरबन्दीको विवरण पठाएका छैनन् । यसैगरी डडेल्धुराका अमरगढी नगरपालिका र नवदुर्गा तथा आलिताल गाउँपालिकाले विवरण नपठाएको सुदूरपश्चिम प्रदेश लोक सेवा आयोगले बताएको छ ।
जनप्रतिनिधि निकटका व्यक्तिलाई विभिन्न रिक्त पदहरुमा जागिर लगाएको कारण स्थानीय तहले स्थायी पदपूर्तिको माग नगरेको हुन सक्ने स्रोतले बताएको छ । आफु निकटका कर्मचारी भर्ना गरेका कारण काममा ढिलासुस्ती हुने गरेको स्थानीयको भनाइ छ ।
प्रदेश लोक सेवा आयोगले भने सबै स्थानिय तहबाट रिक्त दरबन्दीको विवरण प्राप्त हुनासाथ विज्ञापन गर्ने तयारी रहेको बताएको छ ।
