माघ २८, काठमाडौं । चालू आर्थिक वर्षको दोस्रो त्रैमाससम्म उन्नति सहकार्य लघुवित्त वित्तीय संस्था लिमिटेडले रू. २ करोड ७४ लाखभन्दा बढी खुद नाफा गरेको छ ।
गत वर्ष यस अवधिसम्म कम्पनीले रू. ४ करोड ७२ लाखभन्दा बढी खुद नाफा गरेको थियो । गत वर्षभन्दा यस वर्ष कम्पनीको खुद नाफा ४१ दशमलव ९२ प्रतिशत कम भएको हो ।
यस वर्ष कम्पनीको सञ्चालन नाफा ३४ दशमलव ६७ प्रतिशत घटेको छ । गत वर्ष रू. ६ करोड ६६ लाखभन्दा बढी सञ्चालन नाफा गरेको कम्पनीले यस वर्ष रू. ४ करोड ३५ लाखभन्दा बढी यो नाफा गरेको हो । सम्भावित जोखिम शीर्षकमा यस वर्ष कम्पनीले रू. १ करोड ५ लाखभन्दा बढी रकम छुट्याएकाले यो वर्ष सञ्चालन नाफा घट्न पुगेको हो ।
गत वर्ष रू. ८३ लाखभन्दा बढी खराब कर्जा संकलन गरेको कम्पनीले यस वर्ष भने खराब कर्जा नगरेकाले खुद नाफा कम भएको हो ।
हाल कम्पनीको चुक्तापूँजी रू. १७ करोड ६१ लाख ६९ हजार छ । यस वर्ष कम्पनीले ३० प्रतिशत बोनस शेयर वितरण गर्ने प्रस्ताव पुस २८ गतेको वार्षिक साधारण सभाले पारित गरेको छ । उक्त बोनस शेयर भने दोस्रो त्रैमाससम्ममा समायोजन भएको देखिएन ।
कम्पनीको जगेडा कोष रकम ९ दशमलव ४३ प्रतिशत वृद्धि भई रू. १३ करोड १४ लाख कायम भएको छ । कर्जा सापटी गत वर्षभन्दा ११ दशमलव ७१ प्रतिशत बढी रू. २ अर्ब २२ करोड लिएको कम्पनीले १९ दशमलव ७६ प्रतिशत बढी रू. ३ अर्ब २१ करोड कर्जा प्रवाह गरेको छ ।
कम्पनीले यस वर्ष गत वर्षभन्दा ९ दशमलव ३३ प्रतिशत बढी रू. ९७ करोड ५० लाख निक्षेप संकलन गरेको छ । गत वर्ष १ दशमलव ८९ प्रतिशत रहेको निष्क्रिय कर्जा यस वर्ष बढेर ५ दशमलव ८४ प्रतिशत पुगेको छ ।
दोस्रो त्रैमाससम्म कम्पनीको प्रतिशेयर आम्दानी रू. ३१ दशमलव १५ र प्रतिशेयर नेटवर्थ रू. १७४ दशमलव ५९ रहेको छ ।
