काठमाडौं । साताको तेस्रो कारोबार दिन मंगलवार नेप्से परिसूचक २ दशमलव २३ प्रतिशत बढेर २१ सय विन्दुमाथि पुगेको छ । यस दिन नेप्से परिसूचक २ हजार १०६ दशमलव ४८ विन्दुमा पुगेको हो । यो विन्दु करीब पाँच महीनायताकै उच्च हो । यसभन्दा अगाडि गत साउन ११ गते नेप्से परिसूचक २ हजार १२६ दशमलव ४८ विन्दुमा थियो । परिसूचक लगातार ६ दिनमा १५७ दशमलव ८८ अंक बढेको छ ।
मौद्रिक नीतिको पहिलो त्रैमासिक समीक्षापछि बढ्न थालेको बजारले मंगलवार पनि सोही क्रमलाई निरन्तरता दिएको हो । लगानीकर्ताहरूले सेक्टर परिवर्तन गर्दै लगानी गरिरहेका छन् भने केही कम्पनीको शेयर मूल्य छोटो समयमै दोब्बरभन्दा पनि बढीले वृद्धि भइसकेको छ ।
यसो त भर्खर सूचीकृत भएका कम्पनीहरूको मूल्य प्रायः तल्लो विन्दुबाटै शुरु हुने भएकाले ती कम्पनीहरूमा लगानीकर्ताको आकर्षण बढेको देखिन्छ । पछिल्लो समय घटेको ब्याजदर र अधिक तरलताले लगानीकर्तामा पनि उत्साह बढेको देखिन्छ ।
पुस लागेसँगै सबै बैंक तथा वित्तीय संस्थाले ब्याजदर घटाएका छन् । सोही कारण पनि लगानीकर्ता आकर्षित भएको जानकारहरू बताउँछन् ।
यस्तै नेपाल राष्ट्र बैकले शेयरधितो कर्जामा लगाएको १५० प्रतिशतको जोखिम भार अहिले घटाएर १२५ प्रतिशतमा झारेको छ, जसले गर्दा लगानीकर्ताहरूको मनोवल बढेको उनीहरूको भनाइ छ ।
यस दिन कारोबारमा आएका ३१३ धितोपत्रको १ करोड ६४ लाख ५७ हजार १३८ कित्ता शेयर ९९ हजार ६४१ पटकमा रू. ५ अर्ब ९८ करोड बराबरको शेयर कारोबार भएको छ । कारोबारमा आएका धितोपत्रमध्ये ९ धितोपत्रको मूल्य १० प्रतिशतका दरले वृद्धि भएको छ ।
बोटलर्स नेपाल बालाजु, मेरो माइक्रोफाइनान्स वित्तीय संस्था, उन्नति सहकार्य लघुवित्त वित्तीय संस्था, शिवम् सिमेन्ट्स, नेपाल रिपब्लिक मिडिया, घोराही सिमेन्ट इन्डष्ट्रि, हाथवे इन्भेष्टमेन्ट नेपाल, मिड सोलु हाइड्रोपावर र सोनापुर मिनरल्स एण्ड आयल लिमिटेडको शेयर मूल्य अघिल्लो कारोबार दिनको तुलनामा आज १० प्रतिशतका दरले वृद्धि भएको हो ।
मंगलवार सबैभन्दा बढी सिद्धार्थ इन्भेष्टमेन्ट ग्रोथ स्किम २ का इकाईधनीहरूले गुमाएका छन् । यस फण्डको इकाई मूल्य सबैभन्दा बढी ७ दशमलव २६ प्रतिशत घटेको छ । यससँगै फण्डको इकाई मूल्य रू. ८ दशमलव ३० कायम भएको छ ।
शेयर मूल्य सर्वाधिक घट्ने सूचीमा दोस्रोमा माथिल्लो मैलुङ खोला जलविद्युत कम्पनी छ । कम्पनीको शेयर मूल्य ४ दशमलव ९० प्रतिशत घटेर रू. ३३० मा झरेको छ ।
सर्वाधिक शेयर खरीदविक्रीको हिस्सा शिवम् सिमेन्ट्सले ओगटेको छ । यस कम्पनीको रू.३७ करोड ४३ लाख बराबरको शेयर कारोबार भएको हो । कम्पनीको शेयर मूल्य प्रतिकित्ता रू. ५९४ कायम भएको छ । सर्वाधिक शेयर खरीदविक्री हुने दोस्रोमा सोल्टी होटलको रू. २८ करोड ७३ लाख बराबरको भएको हो ।
यस दिन कारोबारमा आएका १३ ओटै समूहगत परिसूचक बढेका छन् । सबैभन्दा बढी होटल तथा पर्यटन समूहको परिसूचक ६ दशमलव ९४ प्रतिशत वृद्धि भएको छ । त्यस्तै उत्पादन तथा प्रशोधन समूहको परिसूचक ४ दशमलव ७४ प्रतिशत वृद्धि भएको छ ।
वैशाख २३, काठमाडौं । खानीखोला हाइड्रोपावर कम्पनीको शेयर मूल्य हालसम्मकै उच्च विन्दुमा पुगेको छ ।
साताको अन्तिम कारोबार दिन कम्पनीको शेयर मूल्य प्रतिकित्ता रू. १६५ पुगेको हो । बिहीवार कम्पनीको शेयर १० प्रतिशतले वृद्धि भएर उक्त विन्दुमा पुगेको हो । कम्पनीको शेयरमा विक्रेताभन्दा क्रेता धेरै भएकाले शेयर मूल्यमा वृद्धि भएको हो । मार्केट डेप्थमा २९ हजार ५८३ कित्ता खरीद अर्डर छ भने विक्री अर्डर शून्य रहेको छ ।
कम्पनीले २०७३ साल जेठ १६ गतेदेखि ३० गतेसम्म आईपीओ निष्कासन गरेको थियो । हालसम्ममा शेयरधनीलाई ुकुनै पनि लाभांश वितरण गरेको छैन । पछिल्लो समय बजार घट्दा जलविद्युत् समूहका कम्पनीहरुको शेयर मूल्यमा वृद्धि भएको छ ।
कतिपय लगानीकर्ताहरुले कम शेयर मूल्य भएका कम्पनीको शेयर ठूलो मात्रामा उठाएर अल्कालिन रुपमा लगानी गरी निश्चित प्रतिफल पाएपछि विक्री गर्ने गरेको पाइएको छ ।
सोही कारण पनि कम शेयर मूल्य भएका कम्पनीकोहरुको शेयर मूल्य बढेको हो । बुधवार पनि कम शेयर मूल्य भएका जलविद्युत् कम्पनीहरुको शेयर मूल्यमा वृद्धि भएको थियो ।
वैशाख ९, काठमाडौं । सिन्धु विकास बैंकको शेयर मूल्य बिहीवार अघिल्लो कारोबार दिनको तुलनामा १० प्रतिशतले वृद्धि भएको छ।
यो समाचार तयार पार्दाको समय ११ : ४० बजेसम्म कम्पनीको शेयर प्रतिकित्ता रू. २८६ पुगेको छ । कम्पनीको शेयरमा विक्रेताभन्दा क्रेता धेरै भएकाले शेयर मूल्य बढेको हो ।
मार्केट डेप्थमा हेर्दा ४० हजार २५२ कित्ता शेयर खरीद माग रहेको छ भने विक्री माग एउटा पनि छैन । बिहीवारको शेयर मूल्य कम्पनीको ६१ कारोबार दिनयताकै उच्च विन्दुमा पुगेको हो ।
वैशाख ८, काठमाडौं । हिमाल दोलखा हाइड्रोपावर कम्पनीको शेयर मूल्य अघिल्लो कारोबार दिनको तुलनामा बुधवार ९ दशमलव १५ प्रतिशतले वृद्धि भएको छ ।
यो दिन शेयर मूल्य प्रतिकित्ता रू. १६७ पुगेको हो । बुधवारको शेयर मूल्य हालसम्मकै उच्च विन्दुमा पुगेको हो ।यो समाचार तयार पार्दाको समय १ : १५ बजेसम्ममा मार्केट डेप्थमा हेर्दा कम्पनीको शेयरमा खरीद माग ३ लाख ५२ हजार १८२ कित्ता छ भने विक्रेता शून्य रहको छ ।
कम्पनीले गत वर्ष साउनमा सर्वसाधारणका लागि आईपीओ निष्कासन गरेको थियो । बुधवार कम्पनीको शेयर मूल्य बढेसँगै सर्वाधिक शेयर खरीदविक्री भएको छ ।
उक्त अवधिसम्म कम्पनीको रू. १५ करोड ७ लाख ७८ हजार बराबरको शेयर खरीदविक्री भएको छ ।
