पुस १०, नयाँदिल्ली(भारत)। भारतका दुई लोकप्रिय मनोरञ्जन टेलिभिजन कम्पनी अन्तत : एकापसमा गाभिने भएका छन् ।
जी इन्टरटेन्मेन्ट इन्टरप्राइजेज लिमिटेड(जेडईईएल) र सोनी पिक्चर्स नेटवर्क्स इन्डिया प्राइभेट लिमिटेड (एसपीएनआई) मर्जमा जान लागेका हुन् । दी इकोनोमिक टाइम्सका अनुसार ती दुवै कम्पनी बीच मर्जर सम्झौतामा हस्ताक्षर समेत भइसकेको छ ।
गत मंगलवार भएको सम्झौता अनुसार मर्जरपछि बन्ने कम्पनीको अधिकांश हिस्सा सोनीको हुनेछ । संयुक्त कम्पनीमा सोनीको ५० दशमलव ८६ प्रतिशत शेयर, जीको संस्थापक समूहको ३ दशमलव ९९ प्रतिशत शेयर र बाँकी सर्वसाधारणको शेयर स्वामित्व रहनेछ । साथै, जीका संस्थापक समूहलाई बजारबाट २० प्रतिशतसम्म हिस्सेदारी पुर्याउन सक्ने विकल्प पनि दिइएको छ ।
भारतका दुई ठूला टेलिभिजन कम्पनीको मर्जले सिंगो भारतीय मिडिया क्षेत्रलाई नै बलियो बनाउने जेडईईएलका प्रवन्ध निर्देशक तथा प्रमुख कार्यकारी अधिकृत (सीईओ) पुनित गोयन्कालाई उदृत गर्दै दी इकोनोमिक टाइम्सले आफ्नो वेब संस्करणमा समाचार छापेको छ । मर्जरपछि इन्टरटेन्मेन्टको क्षेत्रमा भारतको सबैभन्दा ठूलो कम्पनी बन्ने उनको दाबी छ ।
दुई ओटा कम्पनी एकापसमा मर्जभएपछि कम्पनीको समग्र आम्दानी २ अर्ब डलरको नजिक पुग्ने छ। सोनीले आफ्नो १ अर्ब ५७ करोड ५० लाख डलरको पूँजी मर्जपछिको संगठित संस्थामै लगानी गर्ने पनि बताएको छ ।
सोनी र जी बीच मर्जर प्रक्रिया सम्पन्न भएमा रेभिन्युका आधारमा भारतकै दोस्रो ठूलो मिडिया नेटवर्क बन्नेछ । मर्जरपछि बन्ने कम्पनीको स्वामित्वमा ७५ ओटा टेलिभिजन च्यानल, दुई ओटा भिडियो स्ट्रीमिङ सेवा, दुई ओटा फिल्म स्टुडियो, एक डिजिटल कन्टेन्ट स्टुडियो र एक प्रोग्रामिङ लाइब्रेरी हुनेछ ।
मर्जरपछि बन्ने कम्पनीको अधिकृत पूँजी १० अर्ब अमेरिकी डलर पुग्नेछ । मर्जर सम्बन्धी सम्पूर्ण प्रक्रिया सम्पन्न हुन ८ देखि १० महीनासम्म लाग्ने बताइएको छ ।
मर्जरपछि बन्ने संयुक्त कम्पनीको बोर्डमा बहुमत सदस्यहरु भने सोनीले मनोनयन गर्ने छ जसमा एसपीएनआईका प्रबन्ध निर्देशक तथा सीईओ एनपी सिंह समेत हुने बताइएको छ। तर मर्जरपछिको कम्पनीको प्रबन्ध निर्देशक तथा सीईओ भने जीका वर्तमान सीईओ पुनित गोयन्का हुने प्रारम्भिक सहमति भएको छ । सोनीका वर्तमान एमडी तथा सीईओ सिंह भने सोनी पिक्चर्स इन्टरटेनमेन्ट (एसपीई) का अध्यक्ष हुनेछन्।
भारतका कतिपय सञ्चार विज्ञहरुले मध्यकाल र दीर्घकालमा अहिलेका मार्केट लिडरको रुपमा रहेका स्टार र डिज्नीलाई ती कम्पनीको मर्जरपछिको संयुक्त कम्पनीले प्रतिस्थापन गर्ने बताएका छन्। एजेन्सीहरु
