८ महीनाको विकास खर्च २० % मात्रै, गत वर्षको भन्दा कम

चैत १, काठमाडौं। चालू आर्थिक वर्ष २०७८/ ०७९को ८ महिनामा सरकारले पुँजीगत (विकास) बजेट न्यून खर्च गरेको छ । महालेखा नियन्त्रक कार्यालयका अनुसार साउनदेखि फागुन मसान्तसम्म विकास खर्च २० दशमलव ४ प्रतिशत मात्रै भएको हो । चालू आर्थिक वर्षमा कुल विकास बजेट ३ खर्ब ७८ अर्ब ९ करोड ७७ लाख रुपैयाँ खर्च गर्ने सरकारी लक्ष्य थियो । तर, फागुन मसान्तसम्म ७७ अर्ब १४ करोड ६८ लाख रुपैयाँ मात्रै खर्च भएको महालेखा नियन्त्रक कार्यालयको विवरणमा उल्लेख छ ।  कुल लक्ष्यको २० दशमलव४ प्रतिशत मात्रै खर्च भएको उक्त रकम गत वर्षको सोही अवधिको तुलनामा कम हो । गत आर्थिक वर्षको सोही अवधिमा सरकारले विकास बजेट २२ दशमलव ६४ प्रतिशत खर्च गरेको थियो । महालेखा नियन्त्रक कार्यालयका अनुसार चालु आर्थिक वर्षको सो अवधिमा चालू तर्फको खर्च ५० प्रतिशत नाघेको छ । कर्मचारीको तलब, भत्ता तथा कार्यालय सञ्चालन खर्चका रुपमा लिइने चालूतर्फको खर्च फागुन मसान्तसम्म ५ खर्ब ३८ अर्ब ४३ करोड रुपैयाँ खर्च भएको छ । उक्त खर्च चालूतर्फको कुल बजेटको ५० दशमलव ५४ प्रतिशत रहेको महालेखा नियन्त्रक कार्यालयको तथ्यांक छ । चालू आर्थिक वर्षमा सरकारले चालूतर्फको बजेट  १० खर्ब ६५ अर्ब २९ करोड ३९ लाख रुपैयाँ बजेट विनियोजना गरेको थियो । त्यस्तै वित्तीय व्यवस्थातर्फको खर्चको वार्षिक लक्ष्य १ खर्ब ८९ अर्ब ४३ करोड ७६ लाख रुपैयाँ रहेकोमा फागुनमसान्तसम्म ५९ अर्ब ७१ करोड ४५ लाख रुपैयाँ खर्च भएको छ । चालू आर्थिक वर्षमा सरकारले कुल बजेट १६ खर्ब ३२ अर्ब ८२ करोड ९२ लाख रुपैयाँ विनियोजन गरेको थियो । फागुन मसान्तसम्म कुल बजेटको ४१ दशमलव ३६ प्रतिशत खर्च भएको छ । महालेखा नियन्त्रक कार्यालयका अनुसार फागनमसान्तसम्म कुल बजेट ६ खर्ब ७५ अर्ब २९ करोड ७० लाख रुपैयाँ खर्च भएको छ । राजस्व संकलन ५८ प्रतिशत सरकारले चालू  आर्थिक वर्षका ८ महीनामा लक्ष्यको ५८ प्रतिशत राजस्व संकलन गरेको छ । कुल राजस्व संकलन लक्ष्य ११ खर्ब ८० अर्ब ६० करोड ४ लाख रुपैयाँ रहेकोमा फागुन मसान्तसम्म ६ खर्ब ८४ अर्ब ६९ करोड ९४ लाख रुपैयाँ राजस्व संकलन गरेको महालेखाको विवरणमा उल्लेख छ । राजस्व संकलनमा सरकारले करतर्फ १० खर्ब ६७ अर्ब ९६ करोड २५ लाख रुपैयाँ संकलन गर्ने लक्ष्य लिएको थियो । फागुन मसान्तसम्म ६ खर्ब २७ अर्ब ९० करोड ४६ लाख रुपैयाँ संकलन गरेको महालेखा नियन्त्रक कार्यालयको विवरणमा उल्लेख छ । करतर्फको उक्त संकलन कुल लक्ष्यको ५८ दशमलव ७९ प्रतिशत हो । त्यस्तै गैरकरतर्फ वर्षिक राजस्व संकलन लक्ष्य १ खर्ब १२ अर्ब ६३ करोड ७९ लाख रुपैयाँ रहेको थियो । फागुन मसान्तसम्म ५६ अर्ब ७९ करोड ४८ लाख रुपैयाँ राजस्व संकलन गरेको महालेखा नियन्त्रक कार्यालयले बताएको छ ।