११ महीनामा ४० करोडभन्दा बढीको यार्सागुम्बा निर्यात, कुन देशमा कति ?

काठमाडौं । गत आर्थिक वर्ष (आव)को ११ महीनामा यार्सागुम्बाको निर्यात ३१ प्रतिशतले बढेको छ । भन्सार विभागको तथ्यांक अनुसार गत आवको साउनदेखि जेठसम्ममा ६२७ किलोग्राम यार्सागुम्बा निर्यात भएको छ । यो अघिल्लो आवको समीक्षा अवधिभन्दा ३१ प्रतिशत बढी हो । अघिल्लो आव उक्त अवधिमा निर्यात परिणाम ४७६ किलोग्राम थियो ।  गत आवमा यार्सागुम्बाको निर्यात परिणामसँगै रकम पनि बढेको छ । गत आवको साउनदेखि जेठसम्ममा नेपालले ४० करोड ४९ लाख रुपैयाँको यार्सागुम्बा निर्यात गरेको छ । यो अघिल्लो आवको समीक्षा अवधिको तुलनामा ३६ प्रतिशत बढी हो । अघिल्लो आवको सोही अवधिमा नेपालबाट २९ करोड ६७ लाखको ४७६ किलोग्राम यार्सागुम्बा विदेशिएको थियो ।  १२ देशमा निर्यात, तीन चौथाइ हिस्सा हङकङ र कम्बोडियामै  नेपालबाट १२ ओटा देशमा यार्सागुम्बा निर्यात हुने गरेको छ । भन्सार विभागको तथ्यांक अनुसार पछिल्लो ११ महीनामा नेपालबाट कम्बोडिया, चीन, फ्रान्स, जर्मनी, हङकङ, इटाली, कोरिया, मलेशिया, सिङ्गापुर, संयुक्त अधिराज्य (युके), संयुक्त राज्य अमेरिका र भियतनाममा यार्सागुम्बा निर्यात भएको थियो ।   समीक्षा अवधिमा नेपालबाट सबैभन्दा धेरै यार्सागुम्बा निर्यात हङकङमा भएको छ । उक्त अवधिमा हङकङमा १८ करोड ८७ लाख रुपैयाँको २७३ किलोग्राम यार्सागुम्बा निर्यात भएको छ । नेपालबाट यार्सागुम्बा सर्वाधिक निर्यात गर्ने देशको सूचीमा दोस्रोमा कम्बोडिया छ । समीक्षा अवधिमा कम्बोडियाले १२ करोड ४० लाख रुपैयाँको १८४ किलोग्राम नेपाली यार्सा भित्र्याएको छ । हङकङ र कम्बोडियामा निर्यात हुने हिस्सा कुल हिस्साको तीन चौथाइभन्दा बढी हो ।  नेपालबाट यार्सागुम्बा सर्वाधिक निर्यात गर्ने देशको सूचीमा तेस्रो स्थानमा भियतनाम छ । विभागका अनुसार गत आवको समीक्षा अवधिमा भियतनाममा ४ करोड ५३ लाख रुपैयाँको यार्सागुम्बा विदेशिएको छ ।  त्यस्तै, सिंगापुरमा १ करोड ३१ लाखको, अमेरिकामा १ करोड १४ लाखको, चीनमा ९७ लाख १० हजारको, मलेसियामा ८० लाख ३८ हजार, संयुक्त अधिराज्यमा २० लाख ६३ हजारको र फ्रान्समा १० लाख २९ हजारको यार्सागुम्बा नेपालबाट निर्यात भएको छ । त्यसैगरी, इटालीमा ९ लाख ७८ हजारको, जर्मनीमा २ लाख ३० हजारको र कोरियामा ६२ हजारको यार्सागुम्बा विदेशिएको छ ।  कुन देशमा कति ? देश निर्यात (रुपैयाँमा) हङकङ १८ करोड ८७ लाख कम्बोडिया १२ करोड ४० लाख भियतनाम ४ करोड ५३ लाख सिंगापुर १ करोड ३१ लाख अमेरिका १ करोड १४ लाख चीन ९७ लाख १० हजार मलेसिया ८० लाख ३८ हजार संयुक्त अधिराज्य  २० लाख ६३ हजार फ्रान्स १० लाख २९ हजार इटाली ९ लाख ७८ हजार जर्मनी २ लाख ३० हजार द. कोरिया ६२ हजार कुल ४० करोड ४९ लाख स्रोत : भन्सार विभाग ।