महेन्द्रनगर (अस) । बैंक नेपाल बैंक लिमिटेडले महेन्द्रनगरमा वित्तीय साक्षरता कार्यक्रम आयोजना गरेको छ । बैंकको महेन्द्रनगर शाखाले भीमदत्त नगरपालिकासँगको सहकार्यमा ‘अबको चरण : वित्तीय समावेशीकरण’ नाराका साथ सोमवार वित्तीय साक्षरता कार्यक्रम सम्पन्न गरेको हो ।
वित्तीय साक्षरता कार्यक्रमको उद्घाटन गर्दै नगर प्रमुख सुरेन्द्र विष्टले सबै नगरवासीलाई वित्तीय साक्षरता अभियानमा जोडिन आह्वान गरे । पछिल्लो समय डिजिटल बैंकिङ बढ्दै गएको सन्दर्भमा यस्ता कार्यक्रमले बैंकहरूको अनलाइन तथा आधुनिक सेवा सुविधाबारे सेवाग्राहीले जान्ने, बुझ्ने र सिक्ने अवसर पाउने बताए । नगरपालिकाले उद्यमशील नगरवासीलाई उत्पादनसँग जोड्न ‘मेयर उद्यमशीलता’ कार्यक्रम ल्याएको छ । उक्त कार्यक्रमलाई निरन्तर सञ्चालन गरिने जानकारी समेत उनले दिए ।
नेपाल बैंक लिमिडेट महेन्द्रनगर शाखा प्रबन्धक महेशराज जोशीले सहभागीहरूलाई वित्तीय साक्षरता सम्बन्धी प्रशिक्षण दिएका थिए । नेपाल बैंकका गतिविधि, सञ्चालनमा रहेका बैंकिङ सेवा सुविधा र तिनको प्रयोगबारे उनले जानकारी गराएका थिए । धनको सुरक्षा र उपयोगका लागि सबैले बैंकिङ कारोबारमा जोडिनुपर्ने उनले बताए । प्रविधिको विस्तारसँगै बैंकिङ सेवाहरू डिजिटल माध्यमबाट प्रवाह हुन थालेकाले यसको प्रयोगमा अभ्यस्त हुनुपर्नेमा जोड दिएका थिए । कार्यक्रममा ८० जना स्थानीयको सहभागिता थियो ।
