काठमाडौं । न्यू बिजनेश एजद्वारा स्टार्टअपहरूको सिकाइ र अनुभव आदानप्रदानको उद्देश्यसहित प्रशिक्षण दिइएको छ । शुक्रवार काठमाडौंमा सम्पन्न प्रशिक्षण कार्यक्रममा ४० जना स्टार्टअप उद्यमीहरूको सहभागिता रहेको थियो ।
स्टार्टअपहरूलाई दिइएको विशेष प्रशिक्षणका स्रोत व्यक्ति/प्रशिक्षक सफल पाटनर्सका संस्थापक आशुतोष तिवारी रहेका थिए ।
प्रशिक्षक तिवारीले स्टार्टअप उद्यमीहरूलाई उपभोक्तासँगको प्रत्यक्ष सम्पर्क स्थापित गर्न प्रश्न गर्ने परिपाटीको विकास गर्नुपर्ने बताए । प्रश्न गर्ने बानीले उपभोक्ता र आफ्नो वरिपरिको बाँकी संसारसँग पनि घुलमिल हुन सकिने धारणा राख्दै उनले नेपालका उद्यमीहरूको प्रश्न नै नगर्ने बानी ठीक नभएको बताए ।
‘स्टार्टअप शुरू गर्दा सिकेर मात्र शुरू गर्नुपर्दछ । अगाडि बढ्ने यर्थाथमा उभिएर हो, कल्पनामा आधारित भएर निर्णय लिनु हुँदैन ।’ सफल पाटनर्सका संस्थापक तिवारीले आफ्नो अनुभव राख्दै भने, ‘अनुभव बाट सिक्ने गर्नुपर्दछ । सिक्ने कुरा कहिल्यै छोड्नु हुँदैन, सधैं सिक्ने बानीलाई अँगाल्नुपर्दछ । सफल र अनुभवी मानीसबाट आफ्नो व्यवसायको लागि आवश्यक कुरा सिक्नलाई सदैव प्रयत्नशील रहनुपर्दछ ।’
आफ्नो उत्पादनलाई समयसँगै परिमार्जित गरेर लग्नुपर्नेमा जोड दिएका तिवारीले परिमार्जित गर्दै जाँदा वस्तु राम्रो बन्दै जान्छ र समयसापेक्ष परिवर्तनबाट उत्पादनलाई दीर्घकालसम्म बजारमा टिकाइराख्न सहयोग मिल्ने धारणा राखे ।
अहिलेको बजार प्रतिस्पर्धात्मक रहेकाले सेवा प्रदानमा विशेष ध्यान दिँदै निरन्तर बजारीकरण गरीराख्नुपर्ने उनको भनाइ छ ।
‘यी सबै कुराको लागि उपयुक्त टिमको आवश्यकता पर्दछ । त्यस्तो किसिमको कामलाई फोकस गर्ने टिम बनाउनुपर्दछ,' उनले भने, 'साथै स्टार्टअपहरूले आफूजस्तै स्टार्टअपहरूसँग सम्पर्कमा रहने गरी च्यानल निर्माण पनि गर्नु पर्दछ ।’
कानूनी र वित्तीय क्षेत्रलाई स्टार्टअपहरूले विशेष महत्त्वका साथ हेर्नुपर्नेमा सफल पाटनर्सका संस्थापक तिवारीले जोड दिए । अन्यथा विभिन्न खाले समस्याको सामना गर्नुपर्ने अवस्था आउन सक्ने उनको भनाइ छ ।
नेपालमा स्टार्टअपहरूको लागि लगानी जुटाउन केही असहजता रहे पनि असम्भव चाहिँ नरहेको प्रशिक्षक तिवारीले बताए । तर स्टार्टअपबाट स्थापित हुन निश्चित समय छुट्याउनुपर्ने साथै त्यही अवधिभित्र उद्यमलाई स्थापित गरिसक्ने किसिमले अगाडि बढ्नुपर्ने उनको धारणा छ ।
प्रशिक्षण कार्यक्रममा सहभागी स्टार्टअपहरूले आफ्ना प्रश्न, समस्या र अनुभवहरू सुनाएका थिए । साथै उनीहरूले स्टार्टअप प्रशिक्षण कार्यक्रमबाट धेरै नयाँ कुरा सिक्ने मौका मिलेको भन्दै न्यू बिजनेश एजप्रति आभार व्यक्त गरे ।
स्टार्टअपहरूको लागि आयोजित विशेष प्रशिक्षण कार्यक्रममा न्यू बिजनेश एजका प्रधान सम्पादक मदन लम्सालले स्टार्टअपहरूलाई प्रोत्साहन गर्ने उद्देश्यले कार्यक्रम संचालन गरिएको बताए ।
‘स्टार्टअपहरूलाई प्रोत्साहन गर्नु आर्थिक मिडियाको दायित्व हो । हामीले एउटा आर्थिक मिडियाको कर्तव्य स्वरूप नेपालको कठिन परिवेशमा स्टार्टअप संचालन गरिरहेका उद्यमीहरूका लागि प्रशिक्षण कार्यक्रम आयोजना गरेका हौं,' उनले भने, 'स्टार्टअपहरूलाई हौसला प्रदान गर्न न्यू बिजनेश एजले प्रत्येक वर्ष 'स्टार्टअप अवार्ड' कार्यक्रम पनि गर्दै आएको छ ।’
न्यू बिजनेश एजले 'स्टार्टअप समिट एण्ड अवार्ड-२०२३' संचालन गर्दै छ । यसमा देशभरिका २ हजार स्टार्टअपहरूबाट छानिएका उत्कृष्ट स्टार्टअप उद्यमीहरूलाई विभिन्न ३ विधामा अवार्ड दिइने छ । यस वर्ष न्यू बिजनेश एजले संचालन गर्ने 'स्टार्टअप समिट एण्ड अवार्ड'को नारा टु वार्डस् स्टार्टअप नेशन रहेको छ ।
