चितवन । भरतपुरमा ३२ करोड रुपैयाँ लगानीमा रिसोर्ट सञ्चालनमा आएको छ । विभिन्न व्यवसाय र क्षेत्रमा संलग्न ६२ जनाको संयुक्त लगानी चितवन मिड टाउन (सीएमटी) रिसोर्ट सञ्चालनमा ल्याइएको हो । सोमवार भरतपुरमा पत्रकार सम्मलेन गरी रिसोर्ट व्यवस्थापनले औपचारिक रूपमा सेवा सञ्चालन गरिएको जानकारी दिएको छ ।
कार्यक्रममा रिसोर्टका अध्यक्ष भेषराज दुवाडीले भरतपुर शहरका विभिन्न व्यवसाय, पेशा तथा आन्तरिक तथा बाह्य पर्यटकलाई लक्षित गर्दै अत्याधुनिक रिसोर्ट सञ्चालनमा ल्याइएको जानकारी दिए । २०७६ सालदेखि निर्माण शुरू भएको रिसोर्ट हालै सम्पन्न गरी सेवा शुभारम्भ गरिएको हो ।
उनका अनुसार रिसोर्टमा २ हजार ५०० सिट क्षमताको इभेन्ट हल, र अन्य साना तीनओटा हल रहेका छन् । यसैगरी एकपटकमा सय जना क्षमताको भोजनालय, बार कफिसप, स्वीमिङ पुल, वाल ग्यासकेट र वाटर फाउन्टेनको व्यवस्था रहेको छ । चितवनमै पहिलोपटक युरोपियन प्रविधिको किचेन रहेको, जहाँ बिजुली र बाफबाट खाना पाक्ने प्रविधि प्रयोग गरिएको दुवाडीले बताए । आगामी दिनमा डिस्को बार सहितको बसको सुविधा दिन लागिएको भन्दै उनले विभिन्न पर्यटकीय स्थलहरूमा पर्यटकलाई डिनरको सुुविधा सहित घरसम्म पुरयाउने व्यवस्था गरिने जानकारी दिए । यस क्षेत्रमा हुने विभिन्न पार्टी, सेमिनार, सभा, अधिवेशनलाई लक्षित गर्दै रिसोर्ट सञ्चालनमा ल्याइएको उनको भनाइ छ ।
रिसोर्टमा सुविधासम्पन्न ४२ ओटा रूम छन् । साथै रिसोर्टको प्रत्येक तल्लामा २० जना क्षमताको मिटिङ हलको व्यवस्था रहेको छ । कार्यक्रममा रिसोर्टका प्रबन्ध निर्देशक मदन घिमिरेले भूकम्प प्रतिरोधात्मक फलामे पिल्लर र संरचना सहितको रिसोर्ट निर्माण सम्पन्न गरेसँगै सेवा शुरू गर्न लागिएको जानकारी दिए । घिमिरेका अनुसार हाल यहाँ सबै गरी ६२ जनाले प्रत्यक्ष रोजगारी पाएका छन् । निकट भविष्यमा सय जनासम्म पुर्याइनेछ ।
एक बिघा क्षेत्रफलमा फैलिएको रिसोर्टलाई चितवन हल, मिड हल र टाउन हल गरी तीन भागमा वर्गीकृत गरिएको छ, जस अनुसार चितवन हलमा २०० जना क्षमता र मिड हलमा ७०० र टाउन हल दुई हजार जनाको क्षमता रहेको छ । राजमार्ग भएर हिँड्ने यात्रुका लागि छोटो समयका लागि आराम र सुत्ने व्यवस्था गरिएको प्रबन्ध निर्देशक घिमिरेले बताएका छन् ।
