आज शहीद दिवस तथा सप्ताह । जहानियाँ शासनविरुद्ध जीवन र मरणबीचको छनोटमा शहादत स्वीकार गरिएको दिन वा हप्ता । आज देश परिवर्तनका जुन शृङ्खलामा उभिएको छ, त्यसको प्रथम सिंढी आजकै दिन र सप्ताहमा निर्माण भएको थियो । वि.सं. १९९७ साल माघ १० गते मध्यरात काठमाडौँको पचलीमा खरीको रुखमा शुक्रराज शास्त्रीले शहादतको एउटा स्वर्ण इतिहास रच्नुभयो भने धर्मभक्त माथेमाले सिफलमा शहादत वरण गर्नुभयो । यसैगरी माघ १४ गते दशरथचन्द ठाकुरीले राणा शासकले राखेको माफीको प्रस्ताव अस्वीकार गर्दै शोभा भगवतीमा आफूमाथिको गोली प्रहार स्वीकार गर्नुभयो । सोही दिन गङ्गालाल श्रेष्ठलाई शोभाभगतीमा गोली हानी हत्या गरिएको थियो । निरङ्कुश जहानियाँ राणा शासनविरूद्ध बलिदान गरेका अमर शहीदको स्मरणमा माघ १० देखि १६ गतेसम्म ‘शहीद सप्ताह’ मनाइँदै आएको छ । यो दिन तथा सप्ताहले पञ्चायती शासकले हत्या गरेका अनेकौँ शहीदको पनि सम्मान गरेको छ । यो सप्ताह शहादतको सम्मान गर्ने संस्कृतिको प्रतीक हो । चार मात्र होइन हजारौँ शहीदलाई शंस्मरण र सम्मान गर्ने सप्ताह विशेष दिनहरूको योग हो । देश विकासको अठोट गर्ने क्षण पनि हो । एउटै मात्र अभियान र आन्दोलनले मुलुकमा सङ्घीय लोकतान्त्रिक गणतन्त्र स्थापना भएको होइन । आन्दोलनको लामो शृङ्खलामा लाखौँ नेपालीमाथि पाशविक यातना दिइएको, सम्पत्ति हरण गरिएका र परिवारका निहत्था सदस्यलाई प्रताडित गरिएको इतिहास साक्षी छ । शहीद दिवस यी सबै अत्याचार विरुद्धको राष्ट्रिय अभिव्यक्ति पनि हो ।
