साहस उर्जाको आईपीओमा दोस्रो दिनसम्म २.८८ गुणाभन्दा बढी आवेदन

असोज ७, काठमाडौं । साहस उर्जा लिमिटेडको आईपीओमा दोस्रो दिनको अन्त्यसम्ममा २ दशमलव ८८ गुणा बढी आवेदन परेको छ । विक्री प्रबन्धक एनआईबिएल एस क्यापिटलका अनुसार बिहीवार साँझ ५ बजेसम्म १२ लाख ७१ हजार जना आवेदकबाट १ करोड ८६ लाख कित्ताका लागि आवेदन परेको हो ।  यो आवेदन सर्वसाधारणको लागि माग गरेभन्दा २ दशमलव ८८ गुणा बढी आवेदन परेको हो । कम्पनीले भदौ ६ गतेदेखि रू. ७० करोड बराबरको ७० लाख कित्ता आईपीओ निष्कासन गरेको हो ।  निष्कासन गर्ने कुल कित्तामध्ये ३ प्रतिशत अर्थात् २ लाख १० हजार कित्ता शेयर कर्मचारीको लागि र ५ प्रतिशत अर्थात् ३ लाख ५० हजार कित्ता शेयर सामुहिक लगानी कोषको लागि छुट्याएको छ । बाँकी रहको ६४ लाख ४० हजार कित्ता शेयर सर्वसाधारणले आवेदन गर्न पाउनेछन् ।  आईपीओ बन्द मिति छिटोमा असोज १० गतेसम्म रहेको छ । उक्त समय अवधिमा पूर्ण आवेदन नपरेमा असोज २० गतेसम्म आवेदन दिन सक्नेछन् । कम्पनीको आईपीओमा आवेदकले न्यूनतम १० कित्तादेखि अधिकतम १० लाख ५० हजार कित्ताका लागि आवेदन दिन सक्नेछन् ।  कम्पनीले निष्कासन गरेको आईपीओलाई इक्रा नेपालले इक्राएनपी आईआर डबल बी प्लस रेटिङ प्रदान गरेको छ । यस्तो रेटिङले कम्पनीले दायित्व पूरा गर्न सक्ने सम्बन्धमा मध्यम जोखिम रहेको जनाउँछ । सर्वसाधारणले नेपाल धितोपत्र बोर्डबाट स्वीकृति पाएका सम्पूर्ण सि-आस्बा सदस्य बैंक तथा वित्तीय संस्थाहरु तथा तिनका शाखा कार्यलयबाट र मेरो शेयर मार्फत अनलाइनबाट शेयर भर्न सक्नेछन् ।  धितोपत्र निष्कासन तथा विक्री प्रबन्धक एनआईबिएल एस क्यापिटल लिमिटेड रहेको छ । सर्वसाधारणको लागि आईपीओ निष्कासन बाँडफाँट पश्चात कम्पनीको चुक्तापूँजी रू. ३ अर्ब ५० करोड पुग्नेछ । कम्पनीले हाल सोलुखुम्बु जिल्लाको सोलुदुधकण्ड नगरपालिका र थुलुङ्गदुधकोशी गाउँपालिकामा ८६ मेगावट क्षमताको सोलु खोला दुधकोशी जलविद्युत् आयोजना निर्माण गरिरहेको छ । यस आयोजनाबाट २०७९ जेठ २० गतेदेखि विद्युत् उत्पादन हुने सम्भावना रहेको कम्पनीले जानकारी गराएको छ ।