मंसिर २५, काठमाडौं । सेन्ट्रल फाईनान्स लिमिटेडले आइतवारबाट ललितपुरको कानदेवस्थानस्थित आफ्नै नवनिर्मित केन्द्रीय कार्यालय भवनबाट बैंकिङ्ग सेवा सञ्चालनमा ल्याउने भएको छ ।
कम्पनीले छिट्टै नै बचतकर्ता/ ग्राहकहरुको लागि आफ्नै मोवाईल बैंकिङ्ग एपमार्फत मोवाईल बैंकिङ्ग सेवा सञ्चालन गर्न लागेको बताएको छ ।
चुक्तापूँजी ८८ करोड १० लाख रुपैयाँ रहेको उक्त कम्पनीले ५ अर्ब ८४ करोड ८१हजार रुपैयाँ निक्षेप संकलन गरी ४ अर्ब ९३ करोड ९५ लाख ८६ हजार रुपैयाँ कर्जा प्रवाह गरेको प्रमुख कार्यकारी अधिकृत रजोज मान श्रेष्ठले बताएका छन् ।
नवनिर्मित केन्द्रीय कार्यालय भवनसहित कम्पनीले काठमाडौको चावहिलसहित देशका विभिन्न भागमा गरी १४ ओटा शाखा र भक्तपुरको सल्लाघारीमा एउटा एक्सटेन्सन काउण्टर सञ्चालन गरिरहेको छ ।
कम्पनीले डेबिट कार्ड, एसएमएस बैंकिङ्ग, चेक क्लियरिङ्ग, आईपीएस, कनेक्ट आईपीएस, रेमिट्यान्स तथा सी–आस्बाजस्ता आधुनिक बैंकिङ्ग सेवा प्रदान गर्दै आएको र विभिन्न शाखा कार्यालयहरुमा एटीएम मेसिन पनि सञ्चालन गरिरहेको छ ।
कम्पनीले छिट्टैनै झापाको बिर्तामोडमा पनि नयाँ शाखा थप गर्न लागेको बताएको छ । कम्पनीले विगत २४वर्षदेखि बैंकिङ्ग सेवा दिंदै आएको छ ।