काठमाडौं। अन्तरराष्ट्रिय बजारमा बिहीवार कच्चा तेल र बहुमूल्य धातुहरुको भाउ बढेको छ ।
रुसी राष्ष्ट्रपति भ्लादिमिर पुटिनले डोनबास क्षेत्रको सुरक्षाका लागि सैन्य कारबाहीको घोषणा गरेको भन्दै तास न्यूज एजेन्सीले बताएपछि तेल र सुनको भाउ उकालो लागेको हो ।
लन्डानस्थित आईसीईको कोमेक्स डिभिजनमा बुधवार ४ः२८ जीएमटीमा ब्रेन्ट क्रुडको भाउ प्रतिब्यारेल १०१ डलर ७४ सेन्टमा पुगेको थियो । यसअघि सन २०१४ को सेप्टेम्बरमा कच्चा तेलको भाउ प्रतिब्यारेल १०० डलर माथि पुगेको थियो भने सन २००८ मा प्रतिब्यारेल १४७ डलर सम्म पुगेको रेकर्ड छ ।
रुसले युक्रेनमाथि सैन्य कारबाही गर्ने घोषणा गरेपछि तेलको भाउ एकै दिन ५ दशमलव शून्य ६ प्रतिशत अर्थात् ४ डलर ९० सेन्ट बढेको हो । बिहिबार प्राकृतिक ग्यासको भाउ पनि ५ दशलमव ८७ प्रतिशत भन्दा धेरैले बढेको छ ।
यो समाचार तयार पार्दाखेरि नेपाली समयअनुसार बिहान १०ः४० बजेतिर ब्रेन्टको भाउ १०१ डलर २६ सेन्टमा आएको थियो । न्युयोर्क मर्कन्टाइल एक्सचेञ्जको कोमेक्स डिभिजनमा पनि वेष्ट टेक्सस इन्टरमिडियटको भाउ ४ दशमलव ७७ प्रतिशतले बढेर प्रतिब्यारेल ९६ डलर ६३ सेन्टमा उक्लिएको छ ।
सुनको भाउमा पनि उच्च वृद्धि देखिएको छ । बिहिबार स्पट गोल्डको भाउ सन् २०२१ को जनवरीयताकै उच्च स्तरमा उक्लिएको छ । कोमेक्सको शुरुआती कारोबारदेखि नै उकालो लागेको सुनको भाउ उच्चतम् प्रतिऔंस १ हजार ९४८ डलर ३४ सेन्टको उच्च बिन्दुसम्म पुगेको थियो ।
यो समाचार तयार पार्दाखेरि स्पट गोल्ड प्रतिऔंसत १ हजार ९३५ डलर ७३ सेन्टम कायम भएको थियो । यो अघिल्लो दिन बजार बन्द हुँदाको तुलनामा प्रतिऔंसत ७ दशमलव शून्य ७ प्रतिशत धेरै हो । रुस र युक्रेनी तनावले नयाँ युद्ध निम्त्याउने भयबीच पछिल्लो समय बजारमा सेफ हेभन एसेटको भाउ बढेका छन् ।
उता शेयर बजार भने बिहिबार रक्ताम्मे देखिएका छन् । यो समाचार तयार पार्दाखेरि एशियामा सबै बजार रातोमा छन् । एशिया प्रशान्त क्षेत्रमा जापान बाहिरका शेयर बजारको बृहत परिसूचक एमएससीआई ३ दशमलव २ प्रतिशतले घटेको छ ।
चीनमा साङ्हाई कम्पोजिट शून्य दशलमव ८९ प्रतिशतले घटेको छ । हङकङमा हाङशेङ ३ दशमलव ११ प्रतिशतले तल आएको छ । जापानमा निक्केई २२५ २ दशमलव १५ प्रतिशतले घटेको छ ।
त्यस्तै सिंगापुरमा एसजीएक्स निफ्टीमा २ दशमलव ८ प्रतिशतको कमी आएको छ । दक्षिण कोरियामा कोस्पी परिसचूक पनि २ दशमलव ४९ प्रतिशतले घटेको छ । इन्डोनेशिया, भारत, थाइल्यान्ड लगायत यस क्षेत्रका अन्य अधिकांश शेयर बजार पनि रातोमा आएको छ । अष्ट्रेलियामा एएसएक्स २०० २ दशमलव २२ प्रतिशतले घटेको छ । अमेरिकामा पनि शेयर फयूचरहरु तल नै छन् ।
बजारले सधैं रुसी सेनालाई डोनबासमा रोक्न सकिन्छ कि सकिदैंन भनेर हेरिरहेका थिए अहिले सेना किभ तर्फ बढिरहेको स्पष्ट देखिएको पेपर स्टोनमा अनुसन्धान प्रमुख क्रिस वेटन बताउँछन् ।
अहिले भने अवस्था कतिसम्म खराब बन्न सक्छ भन्नेतिर अड्कल अनुमान बढिरहेको छ । अवस्था खराब भयो भने शेयर बजार बियरिश बन्ने उनी बताउँछन् । लगानीकर्ताहरुले जोखिमयुक्त सम्पत्ति छोडेर सेफ हेभन एसेटमा लगानी गर्न थालेपछि बिहीवार सेफ हेभन एसेटहरुको भाउ बढेका छन् । बिहिबार कमोडिटिज बजारमा चाँदी, पालाडियम, प्लाटिनम लगायत अधिकांश बहुमूल्य धातुको भाउ बढेका छन् । एजेन्सीहरुको सहयोगमा
