निफ्रामा लगानी गर्नेको सम्पत्ति एक वर्षमै ५२ अर्ब घट्यो, किन घटिरहेको छ मूल्य ? जान्नुहोस ३ कारण

चैत २२, काठमाडौं । नेपाल इन्फ्रास्ट्रक्टर बैंक (निफ्रा)ले विभिन्न परियोजना निर्माणका लागि लगानी सम्झौता गरिरहेको छ । भरखरै पनि निफ्राले विशेष आर्थिक क्षेत्र (सेज)सँग उद्योग विस्तार गर्न ५ अर्ब ७० करोड रुपैयाँ लगानी गर्ने सम्झौता गरेको छ ।  यो बाहेक पाँचखाल स्मार्ट सिटी विकास गर्न सम्झौता गर्नुका साथै नेपालमा उत्पादिनत विद्युत् अन्तरराष्ट्रिय बजारमा विक्री गर्न विद्युत् कम्पनी खडा गर्न समेत ऊर्जा तथा जलस्रोत मन्त्रालयमा प्रस्ताव बुझाइ सकेको छ । उक्त प्रस्तावलाई मन्त्रालयल पनि सकारात्मक रूपमा लिएको छ । चाँडैनै विद्युत् विक्री गर्न अनुमति दिने बारे मन्त्रालयमा छलफल भइरहेको बताइएको छ ।   यस्तै कम्पनीले चालू आर्थिक वर्ष २०७८/७९ को दोस्रो त्रेमासको वित्तीय विवरण पनि सकारात्मक नै देखिन्छ । उक्त विवरणमा कम्पनीको खुद नाफा ४४ करोड २६ लाख रुपैयाँ छ । गत आवको तुलनामा यो नाफा २५ प्रतिशतले वृद्धि भएको हो । योसँगै वितरण योग्य मुनाफा पनि ३४ करोड ८६ लाख रुपैयाँ रहेको छ ।  तर, अहिलेसम्म केही लगानी नै नगरेका कम्पनी र तिनका वित्तीय विवरणसँगै शेयरमूल्य हेर्दा यो कम्पनीको शेयरमूल्य न्यून देखिन्छ । अहिले यो कम्पनीको शेयरमूल्य दोस्रो बजारमा पहिलो कारोबारका लागि पाएको मूल्यरेञ्जभन्दा कम छ । चैत २२ गते (आज) को कारोबारलाई हेर्दा यो कम्पनीको शेयरमूल्य ३१7 रुपैयाँ रहेको छ ।  किन घट्दै छ निफ्राको शेयरमूल्य ? केही समयदेखि शेयर बजार लगातार घटिरहेको छ । यसले गर्दा पनि निफ्राको शेयरमूल्यमा प्रत्यक्ष प्रभाव परेको देखिन्छ । अहिले यो कम्पनीको मात्रै नभएर वित्तीय विवरण सकारात्मक भएकै अन्य कम्पनीहरूको पनि शेयरमूल्य घटेको छ । घट्दो बजारमा सबै कम्पनीको मूल्य घटेका कारण निफ्राको शेयर मूल्य पनि प्रभावित भएको लगानीकर्ताहरू बताउँछन् । योबाहेक निफ्राले यो वर्ष लगानीकर्तालाई १ करोड ६० लाख कित्ता शेयर बोनसका रूपमा वितरण गरेकाले पनि शेयरको भोलुम बढ्न गएको छ । आइपीओ जारी गर्दा नै सबैभन्दा ठूलो भोलुमको आईपीओ निकालेको कम्पनीको बजारमा शेयर सप्लाई बढी छ । यसले पनि मूल्य घटाउन सहयोग गरेको छ । निफ्राको शेयर मूल्य घट्नुको अर्को कारण भनेको निफ्राले गरेको लगानी दीर्घकालीन भएकोले प्रतिफल पाउन पनि लामै समय कुर्नुपर्ने मनोविज्ञान रहेको लगानीकर्ताहरू बताउँछन् ।   एक वर्षमा ५२ अर्ब ७२ करोड घट्यो लागनीकर्ताको सम्पत्ति  निफ्रामा लगानी गर्ने लगानीकर्ताको सम्पत्ति एक वर्षमा ५२ अर्ब ७२ करोड ८० लाख रुपैयाँ घटेको छ । एक वर्षअघिको तुलनामा निफ्राको शेयर संख्या बढे पनि शेयरमूल्य घटेसँगै लगानीकर्ताको सम्पत्ति घटेको हो ।  एक वर्षअघि २०७७ चैत २४ गते कम्पनीको शेयरमूल्य प्रतिकित्ता ६०६ रुपैयाँ थियो । उक्त दिन कम्पनीको बजार पूँजीकरण (सम्पत्तिको मूल्य) १ खर्ब २१ अर्ब २० करोड रुपैयाँ थियो । तर, कम्पनीले बोनस शेयर दिएर शेयर कित्ता बढेसँगै बजार पूँजीकरण पनि घटेको छ । प्रतिकित्ता बजार मूल्य ३१८ रुपैयाँमा आउँदा कम्पनीको अहिलेको बजार पूँजीकरण ६८ अर्ब ४७ करोड २० लाख रुपैयाँमा झरेको छ ।  निफ्राको पहिलो शेयर कारोबार रू. ३४० देखि खुला भएको थियो । धितोपत्र दोस्रो बजारमा २०७७ फागुन २ गतेदेखि कारोबारमा आएको यो कम्पनीको शेयर कारोबार अहिले मूल्य रेन्जभन्दा कममा कारोबार भइरहेको छ ।