अर्थमन्त्रीका कारण मोरङमा सञ्चालित उद्योगका १ हजार मजदूरले ‘रोजगारी’ गुमाए

अर्थमन्त्री जनार्दन शर्माका कारण मजदूरको मजदूरी खोसिन सुरु भएको छ । आज असार २२ गते बुधबारसम्म मात्रै पूर्वका उद्योगमा मजदूरी गर्ने १ हजार जनाले काम गुमाईसकेका छन् ।जेठ १५ गते ल्याएको बजेटले एमएस वायर उद्योगहरु बन्द हुने अवस्थामा पुगेपछि रडमा आधारित यस्ता उद्योगले मजदूर र कर्मचारी हटाउन थालेका हुन् । मोरङका ५ वटा यस्ता उद्योगले श्रम कानुन अनुसार ‘कन्ट्रयाक्ट’मा राखेका ६ सय बढी कर्मचारी कटौती गरेका छन् ।यस्ता उद्योगहरुले ३० दिनको म्याद राखेर अरु कर्मचारीहरुलाई पनि पत्र थमाईसकेका छन् । २ दिनको लागि मात्रै पुग्ने कच्चा पदार्थ रहेको र त्यसपछि कच्चा पदार्थ ल्याएर उत्पादन गराउन सक्ने अवस्था नरहेको भन्दै आफूहरुले ३० दिनको अवधि राखेर श्रम कानुन अनुसार कर्मचारीहरुलाई पत्र दिएको उद्योगी अनिल शारडाले बताए ।शारडा समूहद्वारा सञ्चालित पायनियर वायर्सले जीआई वायरतर्फ काम गर्ने सबै कर्मचारी हटाउने प्रक्रिया सुरु गरिसकेको छ ।‘९० जनालाई बिदा गरिसक्यौँ, केहीँ गरेपनि अर्थमन्त्री सुध्रिने अवस्था रहेन, त्यसैले अब हामी कच्चा पदार्थ ल्याएर काम गर्ने अवस्था रहेन, त्यहीँ भएर बाँकी ८४ जना मजदुर र २८ जना कर्मचारी पनि हटाउनुपर्ने बाध्यता पर्यो, त्यसैका लागि सूचना निकालेका हौँ’ उद्योगी शारडाले भने ।यसलाई उद्योगले बाध्यात्मक अवकाश भनेको छ ।कुन उद्योगले कति कर्मचारी हटाउँदैछन् ?अर्थमन्त्री शर्माले जीआई वायरको कच्चा पदार्थमा १० प्रतिशत भन्सार र प्रति मेट्रिक टन ४५ सय अन्तःशुल्क लगाएका छन् । भारतले पनि यस्तो कच्चा पदार्थ निर्यातमा गत मे २० बाट १५ प्रतिशत कर लगाएको छ । तर, अर्थमन्त्री शर्माले तयारी बस्तु करिब १७ प्रतिशत कर तिर्दा आईपुग्ने र नेपालमै उत्पादन गर्न कच्चा पदार्थको आयातमै समग्रमा २९.५ प्रतिशत कर लगाउने नीति लिएपछि जीआई वायर उद्योगहरु बन्द हुने बाटोमा छन् । तर एमएस वायरबाट उत्पादन गरिने तयारी जिआई वायरको आयात गर्दा साफ्टा सम्झौताअन्तर्गत नेपालमा ६ प्रतिशत भन्सार र प्रतिकिलो १० रुपैयाँ अन्तःशुल्क तिरे पुग्छ । यसैकारण ठूलो ब्यापारिक घराना विशाल ग्रुपले सञ्चालन गरिरहेको कमला स्टीलले आगामी शुक्रबारसम्म २ सय जना मजदुर हटाउँदैछ । प्रिमियर वायरका सञ्चालक पवन शारडाका अनुसार उनको उद्योगले पनि कन्ट्रयाक्टका २ सय जना मजदुर कटौती गरिसकेको छ । हुलास वायरकी सञ्चालिका युक्ति गोल्छाका अनुसार केही दिन काम गर्न पुग्ने कच्चा पदार्थ बाँकी रहेकाले त्यो सकिनासाथ यहीँ हप्ताभित्र कम्तीमा १५० जनाले मजदूरले रोजगारी गुमाउँदै छन् ।