असार ६, वीरगञ्ज । बाराको सिमरास्थित जगदम्बा स्टिल प्रालिमा आगलागी हुँदा दुई भारतीय मजदूरको मृत्यु भएको छ ।
शनिवार साँझ उद्योगमा रहेको फर्नेस आयलको ट्यांकी मर्मत गर्नेक्रममा भएको आगलागीमा उद्योगका कामदारको मृत्यु भएको हो ।
उद्योगका सञ्चालक पवन गुप्ताका अनुसार फर्नेस आयलको ट्यांकी मर्मतका क्रममा वेल्डिङको झिल्का उछिट्टिएर आगलागी भएको थियो । आगोले जलेर मृत्यु हुनेमा भारतको बिहारस्थित पश्चिम चम्पारणका ४० वर्षीय प्रदीप गौण र बिहारकै सिवान जिल्लाका ४५ वर्षीय रामनाथ महतो रहेको इलाका प्रहरी कार्यालय सिमराका प्रमुख प्रहरी नायव उपरीक्षक दीपक श्रेष्ठले बताए ।
आगलागीमा चार जना घाइते भएका छन् । उनीहरूको स्थानीय अस्पतालमा उपचार भइरहेको छ । दुई ओटा दमकलले एक घन्टा लगाएर आगो नियन्त्रणमा लिएको प्रहरीले बताएको छ ।
यो उद्योगमा यस्ता दुर्घटना हुँदै आएका छन् । केही समयअघि कवाडी फलाम गलाउने भट्टी विस्फोट हुँदा एकजना मजदूरको मृत्यु भएको थियो । त्यसबेला दुई जना कामदार घाइते भएका थिए ।
