कास्की (अस) । उद्योगी तथा व्यवसायीको छाता संगठन लेखनाथ उद्योग वाणिज्य संघको आयोजनामा १७ औं संस्करणको लेखनाथ महोत्सव हुने भएको हो । स्थानीय उत्पादनको प्रवर्द्धन गर्ने उद्देश्यले आगामी माघ १३ देखि २४ गतेसम्म डाँडाकोनाकमा महोत्सव आयोजना गर्न लागिएको आइतबार आयोजित पत्रकार सम्मेलनमा लेखनाथ उद्योग वाणिज्य संघ अध्यक्ष छत्रधर आत्रेयले जानकारी दिए ।
कोभिड–१९ का कारण थला परेको अर्थतन्त्रलाई चलायनमान बनाउने उद्देश्यले महोत्सव आयोजना गर्न लागिएको उनले बताए । ‘लेखनाथको संस्कृति, स्थानीय उत्पादन, विकास र समृद्धि’ नारासहित हुने महोत्सवमा करिब ३०० स्टलले सहभागिता जनाउनेछन् ।
१० करोडको आर्थिक कारोबार हुने अपेक्षा गरिएको महोत्सवबाट १ करोड ५ लाख आम्दानी हुने र ९० लाख खर्च भई १५ लाख बचत हुने अनुमान गरिएको छ । संघका सदस्यलाई प्राथमिकतामा राख्दै १० प्रतिशत छुटमा महोत्सवका लागि स्टल बुकिङ खुला गरिएको वरिष्ठ उपाध्यक्ष विनोद श्रेष्ठले जानकारी दिए ।
सर्वसाधारणका लागि पुस ११ गतेबाट स्टल बुकिङ खुला हुने उनले बताए । महोत्सवमा साहित्यिक कार्यक्रम, महिला विशेष कार्यक्रम, विद्यालयस्तरीय कार्यक्रम, सांस्कृतिक कार्यक्रम, आदिवासी जनजाति विशेष कार्यक्रम, कृषि तथा पशुपक्षी प्रदर्शनी, सूचना प्रविधि प्रदर्शनी, शैक्षिक प्रदर्शनी, हस्तकलालगायत प्रदर्शनी हुनेछ ।
