काठमाडौं । सत्ता समिकरणको खोजी गर्न नेकपा माओवादी केन्द्रका अध्यक्ष पुष्पकमल दाहाल प्रचण्ड र एमाले वरिष्ठ नेता झलनाथ खनाल र माधवकुमार नेपालसँग भेटवार्ता भएको छ । कोटेश्वरस्थित एक घरमा भएको भेटमा पछिल्लो राजनीतिक घटनाक्रमबारे छलफल भएको स्रोतले बताएको छ ।
नेताहरुबीचमा सत्ता समीकरणको सम्भावनाबारे समेत छलफल भएको स्रोतको दावी छ । सर्वोच्च अदालतले एमाले र माओवादी केन्द्र ब्युँताइदिएपछि अलग भएका प्रचण्ड र नेपाल–खनाल समूहबीच कार्यगत एकताको प्रयास भइरहेको छ ।
एमालेभित्र प्रधानमन्त्री एवम् पार्टी अध्यक्ष केपी शर्मा ओली समूहले खनाल–नेपाल पक्षीय नेताहरुको जिम्मेवारी खोसेपछि उनीहरु आक्रोशित बनेका छन् ।
यता, माओवादी केन्द्रले नेपाल पक्षसँग पुनः एकताको सम्भावना देखेपछि सर्वोच्च अदालतले गरेको निर्णयको पुनरावलोकन गर्ने जनाएको छ । यसअघि नेकपाबाट नेपाल समूह एमालेमै फर्किएपछि प्रचण्ड समूह पुनरावलोकनमा नजाने बताएको थियो ।
फागुन २३ गते सर्वोच्च अदालतका न्यायाधीशहरु बमकुमार श्रेष्ठ र कुमार रेग्मीको इजलासले एमाले र माओवादी केन्द्रबीचको एकतालाई अमान्य घोषित गरेको थियो । अदालतले एमाले र माओवादी केन्द्र नै अस्तित्वमा रहेको फैसला सुनाएको थियो ।
यस्तै, माओवादी केन्द्रले पार्टीबाट सरकारमा सामेल भएका मन्त्रीलाई सरकारबाट फिर्ता हुन निर्देशन दिएको छ । आइतबार पेरिसडाडास्थित केन्द्रीय कार्यालयमा बसेको नेकपा(माओवादी केन्द्र)को केन्द्रीय कमिटी बैठकले नेकपा(माओवादी केन्द्र) बाट मन्त्री भएकाहरुलाई मन्त्री पद त्याग गरि सरकारबाट फिर्ता हुन केन्द्रीय कार्यालय बैठकले गरेको निर्णयलाई नै सदर गर्दै फिर्ता हुन निर्देशन दिएको प्रवक्ता नारायणकाजी श्रेष्ठले जानकारी दिनुभयो ।
यता, नेकपा एमालेको प्रचण्ड–नेपाल समूहले अध्यक्ष केपी शर्मा ओलीले गरेको निर्णयलाई मान्यता नदिन आग्रह गर्दै निर्वाचन आयोगलाई पत्र पठाएको छ । हालै एमालेको बहुमत केन्द्रीय सदस्यहरुको बैठकले माओवादी केन्द्रबाट आएका २३ नेताहरुलाई केन्द्रीय समितिमा मनोनित गर्नुका साथै नेताहरुको जिम्मेवारी हेरफेर गरेको थियो ।
