सर्वाधिक पूँजी भएको मुक्तिनाथ विकास बैंकको वित्तीय अवस्था, कोरोना कालमा पनि दोहोरो अंकमा लाभांश

काठमाडौं । सन् २००७ मा ३ जिल्लामा कार्यक्षेत्र बनाई विकास बैंकको रूपमा स्थापित भएको मुक्तिनाथ विकास बैंक सन् २०१२ मा १० जिल्लामा आफ्नो कार्यक्षेत्र विस्तार गरेको थियो भने सन् २०१५ मा यो विकास बैंकले आफूलाई राष्ट्रिय स्तरको विकास बैंकमा स्थापित गर्न सफल भयो ।  कम्पनीको छ सदस्यीय सञ्चालक समितिमा भरतराज ढकाल अध्यक्ष छन् । अध्यक्ष ढकालसँग बैंकिङ क्षेत्रमा २० वर्षभन्दा बढीको अनुभव रहेको छ । उनी विसं २०६३ देखि २०७५ सम्म मुक्तिनाथ विकास बैंकको प्रमुख कार्यकारी अधिकृतमा कार्यरत थिए । त्यस्तै सञ्चालकहरूमा गजेन्द्रमान श्रेष्ठ, रविन्द्रमान श्रेष्ठ, शालिग्राम मिश्र, निर्मला कुमारी केसी कार्की र श्यामसुन्दर शर्मा छन् । शर्मा कम्पनीका स्वतन्त्र सञ्चालक हुन् ।  कम्पनीकोे आर्थिक वर्ष २०७८/२०७९ को वार्षिक प्रतिवेदनअनुसार यस कम्पनीमा सबैभन्दा बढी तुलसीराम ढकालको १३ लाख १० हजार ५७९ कित्ता अर्थात् कुल शेयर संख्याको २ दशमलव ३२ प्रतिशत शेयर रहेको छ । त्यस्तै दोस्रोमा कृष्णमान श्रेष्ठको १२ लाख ५ हजार १६७ कित्ता शेयर रहेको छ । कम्पनीमा शून्य दशमलव ५ प्रतिशतभन्दा बढी हिस्सा २६ जना शेयरधनीको रहेको छ । यस कम्पनीको प्रमुख कार्यकारी अधिकृतमा प्रद्युमन पोखरेल छन् । पोखरेलसँग यस क्षेत्रमा ३० वर्षभन्दा बढीको कार्यानुभव छ । उनी यसअघि (नबिल बैंक लिमिटेड र मेगा बैंक नेपाल लिमिटेड) मा उच्च नेतृत्वमा रहेर काम गरेका थिए ।  कम्पनीले पाँच अर्थिक वर्षमा शेयरधनीलाई कुल ८५ दशमलव ९५ प्रतिशत लाभांश वितरण गरेको छ । कम्पनीले गत आर्थिक वर्षको मुनाफाबाट आफ्ना शेयरधनीलाई १३ दशमलव ५ प्रतिशत बोनस शेयर र कर प्रयोजनको लागि शून्य दशमलव ७१ प्रतिशत नगद लाभांश वितरण गरेको थियो । उक्त बोनस शेयर सूचीकृत भइसकेको छ । बोनस शेयर वितरणपछि कम्पनीको चुक्तापूँजी रू. ६ अर्ब ४२ करोड पुगेको छ । कम्पनीले विगत ५ वर्षमा औसतमा १७ दशमलव १९ प्रतिशत लाभांश वितरण गरेको छ ।  चालू आवको दोस्रो त्रैमास अर्थात् पुस मसान्तसम्म कम्पनीले रू. ६२ करोड ६२ लाखभन्दा बढी नाफा कमाएको छ । गत आवको दोस्रो त्रैमासको तुलनामा कम्पनीको नाफा ३ दशमलव ९६ प्रतिशत वृद्धि भएको छ । कम्पनीले गत आवको दोस्रो त्रैमाससम्म रू. ६० करोड २४ लाख नाफा कमाएको थियो ।  गत आवको तुलनामा चालू आवमा कम्पनीको खुद ब्याज आम्दानी ३३ प्रतिशत र सञ्चालन नाफा ३ दशमलव ९६ प्रतिशत वृद्धि भएको छ । त्यस्तै सो अवधिमा कम्पनीको वितरणयोग्य नाफा रू. ६ करोड ३ लाखभन्दा बढी रहेको छ ।  त्यस्तै चालू आवको दोस्रो त्रैमाससम्म कम्पनीले जगेडामा रू. २ अर्ब १८ करोड एवं रिटेन्ड अर्निङमा रू. ६ करोड ३ लाख सञ्चित गरेको छ । सो अवधिसम्म रू. १ खर्ब ९ अर्ब निक्षेप संकलन गरेको कम्पनीले रू. ९२ अर्ब १९ करोड कर्जा लगानी गरेको छ । कम्पनीको वार्षिक प्रतिशेयर आम्दानी रू. १९ दशमलव ५१, तरलता अनुपात २२ दशमलव ५४ प्रतिशत र प्रतिशेयर नेटवर्थ रू. १३४ दशमलव ९६ रहेको छ ।  कम्पनीको वार्षिक प्रतिवेदनअनुसार कम्पनीको निक्षेप संकलन खर्बभन्दा बढी पुगेको छ । गत आर्थिक वर्षमा कम्पनीले रू. १ खर्ब ४ अर्ब निक्षेप संकलन गर्न सफल भएको छ भने रू. ८६ अर्ब ८१ करोड कर्जा लगानी गरेको छ । कम्पनीले विगतका कोरोना महामारी र लकडाउनका बीच पनि शेयरधनीलाई दोहोरो अंकमा लाभांश वितरण गरेको छ । चार वर्षको नाफाको ट्रेण्ड हेर्दा कम्पनीले आर्थिक वर्ष २०७५/७६ मा रू. ८५ करोड ६१ लाख नाफा कमाएकोमा  गत आर्थिक वर्ष २०७८/७९ सम्म आइपुग्दा रू. १ अर्ब ३४ करोड नाफा आर्जन गर्न सफल भएको छ ।