रौतहट । चन्द्रनिगाहपुर हाट बजारबाट गत शुक्रवार राजन जैसवालले खुत्रुके किनेर ल्याए ।
माटोबाट बनेका दुईओटा खुत्रुके किनेर एउटा आफै र अर्को बहिनीलाई दिएको उनले बताए । जनज्योति माध्यमिक विद्यालयमा कक्षा ८ मा अध्ययनरत राजनले दैनिक १० देखि १०० रुपैयाँसम्म खुत्रुकेमा बचत गर्दै आएका छन् । बचत गरेको रकमले उनले खेलकुद सामग्री किन्ने योजना बनाएका छन् । ‘भर्खरै हाट बजारबाट खुत्रुके किनेर ल्याएँ,’ उनले भने, ‘बहिनीले पनि खुत्रुके बचत गरेको रकमले स्टेशनरी सामग्री किन्ने गरेकी छिन् । उनकी बहिनी नन्दनीले अभिभावकले दिएको खुद्रा रकम बचत गर्ने गरेकी छिन् ।
विद्यालयमा दिउँसो खाजा खान अभिभावकले दिएको रकमको केही अंश बालबालिकाले खुत्रुकेमा बचत गर्ने गरेका छन् । निजी तथा सरकारी विद्यालयमा अध्ययनरत स–साना विद्यार्थीको आकर्षण खुत्रुके बचततर्फ देखिन्छ ।
सोही विद्यालयमा अध्ययनरत प्रिन्स मिश्राले खाजा खान अभिभावकले दिएको रकम आफूले बचत गर्ने गरेको सुनाए । बचत गरेको रकमले स्टेशनरी र खेलकुद सामग्री किन्ने गरेको उनको भनाइ छ । केही महीना अघिमात्र खुत्रुके बचतकै रकम प्रयोग गरेर उनले साइकल किनेका थिए ।
आफ्ना बालबालिकाले खुत्रुके बचत गर्ने बानीको विकास गरेपछि अभिभावकहरू पनि खुशी देखिन्छन् । चन्द्रनिगाहपुरका एक अभिभावक वसन्ती जैसवालले छोराले खाजा खान मागेको पैसा विद्यालयबाट फर्किएर आएपछि खुत्रुकेमा जम्मा गर्ने गरेको बताइन् । ‘छोराको बचत गर्ने बानी बसेको छ । स्टेशनरी र खेलकुद सामग्री जम्मा गरेको रकमले नै किन्छ,’ उनले भनिन्, ‘छोरा अध्ययनरत विद्यालयको मासिक शुल्क मात्र तिर्नुपर्दा सजिलो भएको छ ।’
कक्षा २ मा अध्ययनरत आरध्या पौडेल साथीहरू सबैले पैसा जम्मा गर्न थालेको देखेर आफुले पनि खुत्रुकेमा बचत गरेको बताउँछिन् । अहिले चन्द्रनिगाहपुरमा रहेका एक दर्जनभन्दा बढी निजी तथा सरकारी विद्यालयका विद्यार्थीले खुत्रुकेमा रकम बचत गर्दै आएका छन् ।
स्थानीय जनज्योति माध्यमिक विद्यालयका शिक्षक मधु पौडेलले विद्यार्थीमा बचत गर्ने बानीको विकास भएको बताए । नियमित बचत गर्न अभिभावक, शिक्षक लगायतले बालबालिकालाई प्रेरित गर्नुपर्ने उनको भनाइ छ ।
बालबालिकालाई खुत्रुके बचततर्फ आकर्षित गर्न सहकारी संस्थाका साथै बैंकले पनि विविध योजना ल्याएका छन् । संकल्प बचत तथा ऋण सहकारी संस्थाका अध्यक्ष विभु पोखरेलले खुत्रुके बचत गर्ने बालबालिकालाई जन्मदिनमा उपहार दिने गरिएको बताए । खुत्रुके बचत हुँदै विस्तारै बैंकसम्म बालबालिकाको पहुँच पुग्ने र बचत गर्ने बानी थप विकास हुने उनको भनाइ छ ।