विराटनगर (अस) । नेपाल उद्योग वाणिज्य महासंघका केन्द्रीय सदस्य एवं नेपाल उद्योग वाणिज्य महासंघ, प्रदेश १ उपाध्यक्ष राजेन्द्र राउत प्रदेश १ का मुख्यमन्त्री राजेन्द्र राईको आर्थिक सल्लाहकार नियुक्त भएका छन । भोजपुर पोखरे स्थायी घर भएर लामो समयदेखि विराटनगरमा बसोवास गर्दै आएका राउतलाई मुख्यमन्त्री राईले बुधवार आर्थिक सल्लाहकार नियुक्त गरेका हुन् ।
राउत कुनै पनि दलसँग आबद्ध छैनन् । प्रदेश १ को आर्थिक समृद्धिको जग उद्योग र पर्यटन क्षेत्र रहेको बताउने उनले आर्थिक सल्लाहकार नियुक्त भएपछि प्रदेशलाई समृद्ध बनाउने विषयमा मुख्यमन्त्रीलाई ठोस, तथ्यपरक र समयसापेक्ष सल्लाह दिने बताए । प्रदेशको विकासका लागि औद्योगिकीकरण, पर्यटन र कृषिलाई सँगै लैजानुपर्नेमा उनले जोड दिए ।
