मुलुक कोरोना संकटसँग जुधिरहे पनि आर्थिक गतिविधि सुचारु गराउन सर्वत्र दबाबपछि सरकार लकडाउनको मोडालिटी परिवर्तनका लागि बाध्य भयो । जसका सकारात्मक परिणामहरू देखिन थालेका पनि छन् । सरकारले निजी सवारीसाधनमा जोरबिजोर प्रणाली लागू गर्नेदेखि सिनेमाघर, सार्वजनिक यातायात, डिस्को, क्लब, विद्यालयबाहेकका धेरै क्षेत्र खुला गरेको छ । रेष्टुरेन्ट लगायतका कतिपय क्षेत्रमा सरकारभन्दा एक कदम अगाडि बढेर जोखिम मोलेरै भए पनि स्वस्फूर्त बजार खुलिसकेका छन् । त्यसो त सरकार आफैं पनि वित्तीय संकटमा परेकाले बजार चलायमान बनाएर राजस्व संकलन गरी खर्च धान्नुको विकल्पसमेत थिएन । यसैले कतिपय क्षेत्रमा सरकारले देखेर पनि नदेखेजस्तै गरिरहेको छ ।
