धितोपत्र बजारमा छैन उत्साह, गत साता पनि लगानीकर्ताले ६० अर्बभन्दा बढी गुमाए

काठमाडौं । धितोपत्र दोस्रो बजार १ हजार ८६६ दशमलव ७९ विन्दुमा झरेको छ । पछिल्लो समय धितोपत्र बजारका लगानीकर्तामा उत्साह देखिएको छैन । जसको कारण बजार प्रभावित बन्दै आएको छ । गत साताको अन्तिम कारोबार दिन अघिल्लो साताको अन्तिम कारोबार दिनको तुलनामा धितोपत्र दोस्रो बजारको समग्र कारोबार मापक नेप्से परिसूचक ४१ दशमलव ७६ अंकले घटेको छ । अघिल्लो साताको अन्तिम कारोबार दिन नेप्से परिसूचक १ हजार ९०८ दशमलव ५५ विन्दुमा रहेको थियो । गत साता पाँच कारोबार दिनमा नेप्से परिसूचक एक कारोबार दिनमात्र बढेको छ । पहिलो कारोबार दिन २० अंकले घटेको नेप्से परिसूचक दोस्रो दिन १६ दशमलव ६७ अंक र तेस्रो दिन ५ दशमलव २० अंकले घटेको थियो । चौथो दिन ८ दशमलव ३९ अंकले बढेको बजार अन्तिम कारोबार दिन ८ दशमलव २८ अंकले घटेर बन्द भएको हो । चैत मसान्त नजिकिदैं जाँदा लगानीकर्ताहरूले कर्जाको ब्याज भुक्तानीका लागि पनि रकम जोहो गरेको ब्रोकरहरू बताउँछन् । गत साता नेप्से परिसूचकसँगै ठुला कम्पनीहरूको मात्र कारोबार मापक सेन्सेटिभ इन्डेक्स ६ दशमलव ४५ अंक घटेर ३५३ दशमलव शून्य ३ विन्दुमा झरेको छ । पछिल्लो समय धितोपत्र दोस्रो बजारको कारोबारको अवस्थालाई हेर्दा लगानीकर्ता पर्ख र हेरको अवस्थामा रहेको देखिन्छ । धितोपत्र बजारको विकासका लागि सरोकारवाला निकायबाट आवश्यक पहल भइरहँदा आम लगानीकर्ताको मनोबल बढ्ने खालको गतिविधि भने नभएको देखिन्छ । गत साता पाँच कारोबार दिनमा रू. ४ अर्ब ७८ करोड १७ लाखभन्दा बढीको १ करोड ५० लाख ६२ हजारभन्दा बढी कित्ता धितोपत्र कारोबार भएको छ । अघिल्लो साता भने रू. ५ अर्ब ८३ करोड १६ लाखभन्दा बढीको १ करोड ७४ लाख ३० हजार कित्ता धितोपत्र कारोबार भएको थियो । कारोबार रकम रू. १ अर्ब ४ करोडभन्दा बढीले घटेको गत साता कारोबार कित्ता भने २३ लाख ६८ हजार ७१ कित्ता कम भएको हो । औषतमा गत साता रू. ९५ करोड ६३ लाखभन्दा बढीको धितोपत्र कारोबार भएको छ । गत साता धितोपत्र दोस्रो बजारको कुल बजार पूँजीकरण रू. ६० अर्ब ४९ करोड ७९ लाखले घटेको छ । अघिल्लो साताको अन्तिम कारोबार दिन रू. २७ खर्ब ६४ अर्ब ६६ करोड रहेको कुल बजार पूँजीकरण रू. २७ खर्ब ४ अर्ब १६ करोडमा झरेको हो । गत साता निर्जीवन बीमा समूहले सर्वाधिक गुमाए  गत साताको कारोबारमा निर्जीवन बीमा समूहका लगानीकर्ताहरूले सर्वाधिक गुमाएका छन् । यो समूहको परिसूचक सर्वाधिक ३ दशमलव ५६ प्रतिशत घटेको हो । मर्जर प्रक्रियाका कारण निर्जीवन बीमा समूह अन्तर्गतका कतिपय कम्पनीको एकीकृत शेयर कारोबारपछि मूल्यमा कमि आउँदा परिसूचकमा असर परेको देखिन्छ ।  योसँगै जलविद्युत् समूहको ३ दशमलव ४५ प्रतिशत, वित्तको ३ दशमलव शून्य ८ प्रतिशत, विकास बैंकको २ दशमलव ८६ प्रतिशत, लगानीको २ दशमलव ५८ प्रतिशत, उत्पादन तथा प्रशोधनको २ दशमलव ३९ प्रतिशत, अन्यको २ दशमलव १३ प्रतिशत, जीवन बीमाको १ दशमलव ६१ प्रतिशतले घटेको छ । त्यसैगरी बैंकिङको १ दशमलव ६० प्रतिशत, लघुवित्तको १ दशमलव ५० प्रतिशत, व्यापारिकको १ दशमलव ४७ प्रतिशत, म्युचुअल फण्डको १ दशमलव १९ प्रतिशत र होटल तथा पर्यटनको शून्य दशमलव ३२ प्रतिशत परिसूचक घटेको छ ।