बैतडी । बैतडीको पञ्चेश्वर गाउँपालिकामा रहेको नबिल बैंक अहिले पालिकाका प्रत्येक वडाका गाउँ–गाउँमा गएर खाता खोलिरहेको छ । सरकारले सनमाजिक सुरक्षा भत्ता अनिवार्य बैंकमार्फत भुक्तानी गर्नुपर्ने प्रावधान ल्याएपछि अहिले स्थानीय तहले सबै सामाजिक सुरक्षा भत्ता पाउनेको बैंक खाता अनिवार्य गरेका छन् ।
स्थानीय तहहरुले खाता अनिवार्य गरेपछि अहिले बैंकमा खाता खोल्नेको भीड लाग्ने गरेको छ । भीडलाई नियन्त्रण गर्न र बैंकसम्म आउन नसक्नेलाई लक्षित गरेर बैंकले गाउँ–गाउँमै पुगेर खाता खोल्न लागेको हो । बैंकले गाउँ–गाउमै गएर ज्येष्ठ नागरिक, एकल महिला, अपांगता भएका र पाँच वर्षमुनिका बालबालिकाको खाता खोलिरहेको छ । गाउँमै आएर खाता खोलिदिएकामा धेरैजसो ज्येष्ठ नागरिक र आपांगता भएका व्यक्तिलाई बोकेर बैंकसम्म लग्नुपर्ने बाध्यता हटेको पञ्चेश्वर गाउँपालिका–२ का लोकेन्द्र चन्द रजवारले बताए ।
बैंकले जसरी गाउँमै आएर खाता खोल्दै छ, त्यसरी नै गाउँमै आएर प्रत्येक चौमासिकको सामाजिक सुरक्षा भत्ता पनि वितरण गरिदिनुपर्ने माग ज्येष्ठ नागरिकले राखेका छन् । जिल्लाका १० स्थानीय तहमध्ये दशरथचन्द नगरपालिकाले मात्र सरकारको यो प्रावधान आउनुअघि नै बैंकमार्फत सामाजिक सुरक्षा भत्ता वितरण गर्दै आएको थियो ।
बाँकी ९ मध्ये ८ स्थानीय तहले चालू आर्थिक वर्षदेखि मात्र बैंकमार्फत सामाजिक सुरक्षा भत्ता वितरण गरिरहेका छन् । जिल्लाका १० वटै स्थानीय तहमा बैंकका शाखा पुगे पनि सिगास गाउँपालिकामा इन्टरनेट नचल्ने हुँदा त्यहाँको बंैकको शाखाले अनलाइनबाट हुने काम गर्न सकेको छैन । सिगासमा रहेको बैंक शाखाले अनलाइनमार्फत काम गर्न नसकेपछि त्यहाँ सामाजिक सुरक्षा भत्ता बैंकमार्फत वितरण गर्न समस्या भएको पालिकाले बताएको छ ।
