प्रादेशिक स्टार्टअप नीति तर्जुमाका लागि संवाद

विराटनगर  । कोशी प्रदेशको Startup नीति तर्जुमाका लागि विराटनगरमा सरोकारवालाहरूबीच संवाद भएको छ । नेपाल उद्योग वाणिज्य महासंघ कोशी प्रदेश र प्रदेशको उद्योग, कृषि तथा सहकारी मन्त्रालयको आयोजनामा बिहीवार संवाद कार्यक्रम गरिएको हो । कार्यक्रममा प्रादेशिक Startup नीति तर्जुमा कार्यलाई समयसापेक्ष बनाउने, प्रदेशभरका स्टार्टअपको विवरण अद्यावधिक गर्ने, नीतिमा समावेश गर्ने विषयको पहिचान गर्ने, लगानीको तौरतरीका र Technologyको प्रयोगबारे धारणा विकास गर्ने लगायत विषयमा अन्तरक्रिया भएको छ । कार्यक्रममा कोशी प्रदेश सरकारका उद्योग, कृषि तथा सहकारीमन्त्री भक्तिप्रसाद सिटौलाले नव उद्यमीको व्यवसाय प्रवर्द्धनका लागि प्रदेश सरकारले सहयोग गर्ने बताए । नेपाल उद्योग वाणिज्य महासंघ कोशी प्रदेशका अध्यक्ष राजेन्द्र राउतले नेपालमा कुनै पनि नयाँ आइडियालाई रोक्न नहुने बताए । नयाँ नयाँ आइडियालाई सरकार र निजीक्षेत्रले सहयोग गर्दै अघि बढाउन सके त्यसबाट मुलुकमा नवप्रवर्तन सम्भव हुने उनको भनाइ थियो । विश्वमा स्टार्टअप संस्कृति धेरै पुरानो भए पनि नेपालमा भर्खर हुर्कंदै गरेको र उद्यमशीलताप्रति नवउद्यमीको चाख तथा आकर्षण उल्लेख्य बढेको उनले बताए ।  उद्योग, कृषि तथा सहकारी मन्त्रालयका सचिव मेघनाथ तिमल्सेनाको अध्यक्षमा आयोजित कार्यक्रममा स्टार्टअप विज्ञहरू जीवनप्रकाश सिटौला र निरज खनालले नेपालमा स्टार्टअपको विकास, पृष्ठभूमि, स्टार्टअप नीतिमा प्रस्तावित व्यवस्थाहरूबारे प्रस्तुतीकरण गरेका थिए । उक्त प्रस्तुतिमाथि टिप्पणी गर्दै युवा उद्यमी प्रतीक राउत, कृषिविज्ञ डा. राजेन्द्र उप्रेती, मन्त्रालयकी खाद्य अनुसन्धान अधिकृत विमला पोखरेल, इनरुवा उद्योग वाणिज्य संघका अध्यक्ष वीरेन्द्रकुमार साह, नेपाल घरेलु तथा साना उद्योग संघ मोरङका अध्यक्ष चेतन निरौला, विकल्प द अल्टरनेटिभका वसन्त अधिकारी लगायतले स्टार्टअप क्षेत्रलाई अघि बढाउन सरकारले उपयुक्त नीति निर्माण गर्नुपर्नेमा जोड दिएका थिए ।