चैत २२, काठमाडौं । चोभार सुक्खा बन्दरगाह अन्तत : मंगलवारदेखि औपचारिक रुपमा सञ्चालनमा आएको छ ।
प्रधानमन्त्री शेरबहादुर देउवाले मंगलवार औपचारिक रुपमा बन्दरगाह सञ्चालनको उद्घाटन गर्नुभएको हो ।
उहाँले वीरगञ्जबाट आएको मालबाहक ट्रकलाई प्रवेश गराएर बन्दरगाह सञ्चालनको शुरु गर्नुभएको थियो ।
उक्त अवसरमा प्रधानमन्त्री देउवाले चोभार बन्दरगाह सञ्चालनले काठमाडौंलाई अन्तरराष्ट्रिय व्यापारको हब बनाउने बताउनुभयो । चोभार बन्दरगाह सञ्चालन पछि व्यापारलाई सरलीकरण र पारदर्शी बनाउने भन्दै उहाँले गुणस्तरीय व्यापार पूर्वाधारले सबैलाई लाभ पुग्ने र वैदेशिक व्यापार थप व्यवस्थित एवं प्रतिस्पर्धात्मक बताउनुभयो ।
तेस्रो मुलुकबाट मालवस्तु बोकेर आएका ती कन्टेनर वीरगञ्ज नाका हुँदै काठमाडौं आएका थिए । अब स्थलमार्ग हुँदै गरिने अन्तरराष्ट्रिय व्यापारको भन्सार जाँच पास काठमाडौंबाटै गर्नका लागि बाटो खुलेको छ ।
सीमास्थित भन्सार कार्यालयबाट आन्तरिक परिवहन गरी अब सिधै चोभार सुक्खा बन्दरगाह भन्सार कार्यालयमा जाँचपास गर्न सकिनेछ । अब व्यवसायीले आयात गरेका वस्तु सक्खा बन्दरगाह भन्सार कार्यालयबाट जाँचपास गराउन पाउने छन् ।
भन्सार विभागले काठमाडौंस्थित चोभार सुक्खा बन्दरगाहमा भित्रिने मालबाहक सवारी साधनको यसअघि नै रुट तय गरिसकेको छ ।
भन्सार विभागले भारतर्फका पाँच ओटा प्रमुख नाकाबाट आन्तरिक परिवहनको सुविधा अन्तर्गत स्थलमार्ग हुँदै उक्त बन्दरगाहमा भित्रिने सवारी साधनको सडक मार्ग तोकेको हो ।
उक्त रुटअनुसार सबै सीमा क्षेत्रका नाकाबाट भित्रिने सवारी साधनहरु अनिवार्य रुपमा बल्खु आइपुगेर मात्रै उक्त सुक्खा बन्दरगाहमा प्रवेश पाउने छन् ।
विभागका अनुसार मेची भन्सार कार्यालय कांकडभिट्टाबाट मालवस्तु लिएर सवारी साधन मेची, विर्तामोड, इटहरी, बर्दिबास, पथलैया, हेटौंडा, नारयणगढ मुग्लिङ, नौबिसे, नागढुंगा थानकोट र कलंकी बल्खु हुँदै सुख्खा बन्दरगाह पुग्नेछन् ।
यस्तै विराटनगर भन्सार कार्यालयबाट मालवस्तु लिएर छुटेको सवारी विराटनगर, दुहवी, इनरुवा बर्दिबास, पथलैया, हेटौंडा, नारायणगढ मुग्लिङ, नौबिसे, नागढुंगा थानकोट र कलंकी बल्खुहुँदै सुक्खा बन्दरगाह पुग्नेछन् ।
त्यस्तै वीरगञ्ज भन्सार र सुक्खा बन्दरगाह सिर्सियाबाट छुटेको सवारीसाधन सिर्सिया, परवानीपुर, पथलैया, हेटौंडा, नारयाणगढ मुग्लिङ, नौबिसे, नागढुंगा थानकोट र कलंकी बल्खुहुँदै सुक्खा बन्दरगाह पुग्नेछन् ।
यस्तै भैरहवा भन्सार कार्यालय बेलहिया रुपन्देहीबाट छुटेको सवारीसाधन बेलहीया, परासी, भुमही, बर्दघाट, नारयणगढ मुग्लिङ, नौबिसे, नागढुंगा थानकोट र कलंकी बल्खुहुँदै सुक्खा बन्दरगाह आइपुग्ने छन् ।
नेपालमा यसअघि तीन ओटा सुक्खा बन्दरगाह सञ्चालनमा आइसकेको छ । विराटनगर, वीरगञ्ज र काँकडभिट्टास्थित सुक्खा बन्दरगाह सञ्चालनमा आइसकेको छ ।
चोभार बन्दरगाह सञ्चालनमा आउँदा अन्तरराष्ट्रियस्तरमा वस्तु ओसारपसार र मालसामान ढुवानी गर्न सक्षम हुनुका साथै लागत खर्च घटाउन पनि ठूलो सघाउ पुग्नेछ अपेक्षा नेपाली व्यापारीहरुले गरेका छन् ।
आयात र निर्यातका लागि भन्सार, क्वारेन्टाइन, सुरक्षासहितको सबै पूर्वाधार रहेको उक्त बन्दरगाहमा ५०० कन्टेनर र ५०० ट्रक अट्ने क्षमता छ ।
