विराटनगर । विराटनगर महानगरपालिकाको कञ्चनबारीमा १५ करोड रुपैयाँ लगानीमा २५ शøयाको न्यूरो अस्पताल सञ्चालनमा ल्याइएको छ । लामो समय न्यूरो सर्जनका रूपमा काम गरेका डा. पंकज नेपालले उक्त अस्पताल सञ्चालनमा ल्याएका हुन् । आर्या हस्पिटल अफ न्यूरो सर्जिकल एण्ड अप्लाइड साइसेन्स प्रालिले सञ्चालनमा ल्याएको आर्या न्यूरो हस्पिटलबाट अत्याधुनिक प्रविधियुक्त सेवा प्रवाह गरिने बताइएको छ ।
अस्पतालका प्रबन्धक निर्देशक डा. नेपालले न्यूरो सर्जरीको क्षेत्रमा अन्यत्र लिइने शुल्कभन्दा कम शुल्कमा सेवा दिइने बताएका छन् । गरीब र असहायका लागि निःशुल्क सेवा दिने उद्घोष समेत उनले गरेका छन् ।
दुर्घटनाका बिरामी र खासगरी टाउकाको चोटपटकमा चाँडै शल्यक्रिया गरेर बिरामीको उपचार गर्न इमर्जेन्सीसँगै जोडेर शल्यक्रिया कक्षको व्यवस्था गरिएको उनले बताए ।
भेन्टिलेटर सहितको आईसीयू कक्ष, न्यूरो सम्बन्धी सम्पूर्ण सेवा, हाडजोर्नी, नाक, कान घाँटी, दन्त चिकित्सा, जनरल तथा ल्याप्रोस्कोपी, ओपीडी सेवा, फिजियोथेरापी, सिटी स्क्यान र एमआरआई सेवा उपलब्ध रहेको उक्त अस्पताललाई चाँडै ५० शøयाको बनाइने डा. नेपालले जानकारी दिए ।
अस्पतालले प्रारम्भिक चरणमा १२ जना मेडिकल अफिसर, ११ जना नर्समार्फत सेवा दिनेछ । सबै विभागमा गरी करीब १०० जनाले रोजगारी पाएको अस्पतालका अर्का साझेदार तथा व्यवस्थापक दिनेश ठाकुरले बताए ।